Popular Bible Verses from Iacov 3

Share

Ma mintimeniljea tsi yini dit nsus prota easti curatã, deapoea puituitã, moali, ascultãtoarã, mplinã di njilã sh-cu fruti buni, fãrã-hãtãri sh-fãrã-ipucrizii.

Cai di voi easti mintimen shi shtiut? S-li aspunã cu purtari mushatã faptili a lui, cu inimã fronimã tsi yini di mintimeniljea.

Frutlu a ndriptatiljei si seaminã cu pace di atselji tsi fac pacea.

Cã aclo iu ari zilii shi ambitsii egoistã, aclo ari mintiturã sh-soi di soi di lucri arãi.

Cu limba noi ghinicuvãntãm Domnul shi Tatãl, sh-cu atsea noi blãstimãm oaminjlji cai suntu fapts dupã undzearea a Dumnidzãlui. Di unã gurã easi ghinicuvintarea sh-blãstimarea. Frats sh-surãri a melji, nu prindi s-eara ashã.

Sh-limba easti foc, lumea a nindriptatiljei. Limba easti bãgat namisa di mãdularili a truplui, lãvusheashti tut truplu, aprindi roata a banãljei shi s-aprindi di Gehena.

ma limba vãrã om nu poati su imiripseascã. Ea easti un arãu disfãrnat, mplinã di fãrmac tsi adutsi moarti.

Frats sh-surãri, nu vã fãtsets mults di voi nvitsãtori, shtinda cã va lom unã giudicatã ma aspru.