Popular Bible Verses from Dodadi 37

Share

De o futu moiuku o Yusupu wobuluhara de ai buluhara ma dola waade-ade ai ria-riakika. Ka de ai buluhara gea yoihene de manga dohata idogoli hiadono ilamoko unangika.

De nako o Isiraele ai ngofaka ona mata-mataika ma, ka o Yusupohi duru widora angamoi una iwiperekioka ma oraha o Yusupu womaboa. De ma titi duru wisanangi o Yusupika ho wihidoaka unangika ai baju ma gogurutuku de duru irahai.

Masara ai ria-riaka iwitaleana ma titi manga baba duru ka o Yusupohi wilegaika de ai dora. De ona igoungu iwidohata manga dodotika hiadono ko iwihidodiaiokaua iwitemo unangika.

De ipaha o Yusupu wobuluharoli de ai buluhara ma titi enangoo wahingahu ai ria-dodotika wato, “Marai ngohi ka tobuluharokali de hokonaa ahi buluhara: gea tamake o wange, de o mede, de o murumu ngimoi de moi ikokiboa ngohino de ahao ena mata-mata gea de ma horomati ngohino hiadono imaponu-ponuku ahi himangoka hiadono itiki o tonakuku. Hokogea ahi buluhara.”

De ma titi ai buluhara gea hiadono ai ria-riaka manga daleana ka idogo-dogo masara manga baba duru womahihohininga ma titi o Yusupu ai buluhara gea.

Abe una waade-ade onangika wato, “Abeika o futuika ahi buluhara! Ngone o tau moi hongodumu o redioka hokarajaanga abe nanga gandumu hohidotoino de ma roehe ka ma moi ibooto de ahao hapaki-pakitino o papakiti amomoi. De to ngohi abe tapakitino ena imaokoiye duru imaboo-bootiye masara ti ngini homoi-homoiika abe niapaki-pakitino gea ena ikokiboa to ngohino de akilolitino de imaponu-ponuku to ngohi ahi papakitika.” Hokogea o Yusupu ai buluhara ma ade-ade.

Abeika, nako una hitoma ibooto de ahao hiumo o nyawa manga baituku. De ahao ka idadi nanga baba hihingahu dika hato o fuhuku ma aewani iwigolioka. Gea de ngone ahao hamake hokokia to una ai buluhara idadi.”

Hokogea o Yehuda ai demo de ai ria-dodoto iwihigihene ho ka de ona abe yoboa o Midiana ma tonakino gea yomahitiginoka de o Yusupu ai ria-riaka iwihihupu o humuino de iwifukunu onangika de ai ija o haaka ise-senge monaoko. De gea iwifanguoka de ahao o Isimaele ma nyawa gea o Yusupu iwiao o Mesiiri ma tonakika.

Abe yato, “Abeika, genanginoka ma Tobabuluhara!

De o Yusupu ko ai gurutikahi de ai ria-riaka iwimake abe woboaino de ona yomahikokagaro iwihidee ato iwitoma.

De gea ma titi o kia ho hiadono hato itiai ai awunu hakopoa? Koaho hiumo ai ngango dika o tonaka ma baituku de gea ika-ika de ahao wohonenge genangoka ho ngaro ufa dika de ai awunu hakopoa.” Hokogea o Rubene ai demo angamoi ai hiningaka womatemoka wato, “Nako hokogea dika yodiai de ka idadi ngohi ahao tomatohiki tigilio la ka idadi tihihupu de tingotaka o babaika la ufa wobodito ahi dodoto.” Hokogea o Rubene ai hininga.