Мом ӱшанен вучаш Юмо мемнам ӱжмым палыза, Тудын святой-влаклан пуышаш чапле наследствыже могай поян улмым умылыза да Тудын вий-куатше мемнан дене, ӱшаныше-влак дене, таҥастараш лийдыме могай кугу улмым те палыза манын, Юмо тендан шӱм шинчадам волгалтарыже. Тиде кугу вий-куатшым Христос гоч ончыктен, Тудым колымаш гыч ылыжтен да пылпомышто Шкенжын пурла могырышкыжо шынден. Христосым Юмо чыла тӱҥалтыш, власть, куат да озаланымаш деч кӱшкӧ, тиде курымышто веле огыл, а шушаш курымыштат пуымо чыла лӱм деч кӱшкӧ шынден.