Popular Bible Verses from Epɛs 4

Share

Laagɨŋ ɗarwa dan̰ gusɨgɨŋ bɨ, sɨlagɨŋ cɨn̰-n̰age da gusɨgɨŋ bɨ. Ɗagɨŋ kuduroygɨŋ jala cay gusɨgɨŋ hɨn̰ gɨ Kumu ba ɗen̰ kuduroy jal caygɨŋ a te bugoŋ pɨna dan̰ Kɨris le bɨ.

Wɔyɛgɨŋ hɨn̰ kalaŋ ga ka-dɔgɛ jorgiige wo̰ naŋ bɨ, laagɨŋ hɨnga dan̰ kaledɨgɨŋ ga jali bɨ, a boy hɨnga gaŋ nɔm. Wɨyagɨŋ ka-dɨbe ɗugɔ jɨn̰ tumɔ tumɔ bɨ. Ƴɨmagɨŋ kuduroygɨŋ duroygɨŋ, dan̰ gɨyəŋ gɨ da wandɨ.

Ɗɔɔgɨŋ kɔl gɨ ɨsɨni andaŋ kɨbɨgɨŋ naŋ, ama na kɔl gɨ ɗari ƴɔbɨ, ɗe leen̰ kalaŋ ga jege le ɗarwa bɨ, orɨn̰ge cɨndɨge tumɔ bɨ.

Kuɗa gɨ kuduroy-ɗan̰ɨwa bɨ, bɔyɛ-asɨn̰e bɨ, kuduroy-hɔmɛ bɨ, adɨlde toygɨŋ bɨ, yagɨde kɨɗɨn̰ bɨ, kuduroy-ɨndɨwa di tɔɔ kan̰do kan̰do bɨ, unɔ duroygɨŋ.

Hɨn̰ gɨ kuduroy-hɔmɛ na laagɨŋ na, kɨŋ ɗɔɔ ba lɔɔ ɨsɨna naŋ, ɗɔɔgɨŋ tɨwa ɗɔbɛ a cay kuduroy-hɔmɛ togɨŋ dɨŋ naŋ, ɗɔɔgɨŋ gɨyəŋ bɨn̰ haban̰ dɔɔ-ƴaa caygɨŋ naŋ.

Ɗagɨŋ gɨye-lɔɔdɨgɨŋ ga tumɔ coŋ. Gɨye-lɔɔdɨgɨŋ ga tumɔ le ƴɨmagɨŋ dɨragɨŋ gusɨgɨŋ coŋ, hɨn̰ badɨge ga ɨlgi wo̰. Kɨŋ-gandi le tumɔ tabɨlaŋdi nare cɨn̰ kalaŋ gɨ wanɨn̰ kuduroygɨŋ daa jɨŋ jɨŋ le mondɨgɨŋ. Ɗagɨŋ Turnɔ di kan bɨgɨŋ le, lee gɨ hɨnga-sɔlɛ kagɨŋ bɨl ga hɨrɨwa. Laagɨŋ gɨye-lɔɔ gɨ da ungo gɨ hɨrɨwa gɨ Kumu ɗey ɗe na andaŋ le hɨn̰ badɨge ga hɨrɨwa ga kɨŋ dobɨ gusɨgɨŋ wo̰: Na ungo gɨ dan̰ durɔ bɨ, gɨ woy dan̰ cɨndi bɨ, dan̰ gɨyəŋ gɨ da kɔl gɨ cɨndi bɨ.

Turnɔ di da Kumu leegɨŋ leen̰ te wɔɔ gɨ pɨna. Dɨbgɨŋ gusɨgɨŋ coŋ agɨŋ gamɨn̰ bugoŋ pɨna gɨ nee le, sɨman̰gɨŋ dan̰ gusi-dɔbɛ gɨ saɗɨgɨŋ pɨna le.

Hɨnga ga ban bɨn̰ kalaŋ kalɨn̰ le, na ka-gɨre-gɨye bɨ, ka-yɔɔ-kɔl-gɨ-Kumu-ba-yɔɔ bɨ, ka-tɔgɛ bɛrnɛ Kɔl-gɨ-Ɗari bɨ, ka-sɔlɛ kardi kalaŋ ga da Kumu dan̰ ka-gɨlɨn̰ kalaŋ hɨnga bɨ. Ban bɨge hɨnga ga kalɨn̰ ga nee le, ɗe kalaŋ ga woyge dan̰ cɨndɨge na ɓalɨn̰ge leen̰ge gɨye koyi le, ɗe kuyoŋdi Kɨris na orɨn̰ jɨn̰ tumɔ tumɔ. Na hɨn̰ wo̰ ma, ma na kɨya loon̰ gɨye bɨrɨŋ gɨsɨn̰ gɨ na-gandi nɔm, na na bugoŋgɨŋ pɨna te aye kudurɔ gɨŋ bɨ, na na sɨlan̰gɨŋ Kurɨn̰-Kumu nara bɨ. Ɨni na, na-gandi nɔm na kɨya bɨləŋgɨŋ kalaŋ ga cɨndɨge nadɨrdaŋ ga malgɨge bɨrɨŋ ɓalɨn̰ge dan̰ Kɨris ca ca.

Hɨn̰ wo̰ na, na kɨya bɨləŋ wɔyɛ hɨn̰ karɨn̰aŋ ga ɨran̰ge dan̰ ƴɔmɛ kudurɔ osɨwa naŋ ɨni. Kan gɨlɨn̰ge na hɨn̰ togɨ ga n̰ən̰əŋ ga a cay kaŋ gaŋ. Kan ɨran̰ge dan̰ tɔgɨ a cay mɛw di orɨn̰ danage bɨ, nongɨldɨge jɨn̰ kɛ kɛ bɨ naŋ. Kɨradi-kɔl gɨ kɛ le, kal bɨ, mɛw bɨ le, kan na hɨnga ga ni gɨle ga dan̰ gɨyəŋdɨge naŋ, ga kalaŋ ga pɨna gɨlɨn̰ge kamdɨge bɨ, na cɨn̰-muɗɔlɛ di kan narɨn̰ge cɨn̰ kalaŋ bɨ kayɨn̰ge kalaŋ bɨ. Ama na kɨya yɔ kɔl gɨ cɨndi dan̰ wandɨ, hɨn̰ wo̰ na na kɨya malge bɨlɨn̰ kalaŋ ga cɨndɨge nadɨrdaŋ cay hɨnga nɔm dan̰ te bugoŋ pɨna dan̰ Kɨris. Ban ma na ba-cayna.