Popular Bible Verses from Rom 5

Share

Ko nam ná ye Baŋa Wɛ, wonto bere debam o na tiini o jege debam swono tei to de o na pɛ se Yezu Krista ba o te debam ŋwaane ye dé daa ta tɔge wɛleera chwoŋa to.

Dé na jege teena konto to bá pa dé na dé chaveera, kolo ŋwaane Wɛ tiini o ke o swono debam bochara ne, de o na pɛ o Sin-laao kom ta wo debam tei ne to.

Dé nam ta jege wopwolo dé yaara yam baŋa ne, kolo ŋwaane dé yei we yaara wae ya pae se dé fɔge dé zege mo de pu-dɛa. Dé pu-dɛa kam laam maa pae dé jege boboŋ-dɛɛra de Wɛ. Dé boboŋ-dɛɛra yam ta mo pae dé jege teena Wɛ tei ne.

Dé na ke dé wo-dedoa de Wɛ to mo pae dé jege chega o yiga ne. Konto ŋwaane, dé na me de dé Teiru Yezu Krista to mo pae debam de Wɛ fɔge daane. Yezu mo jaane debam o vo o zege Wɛ yiga ne, ye Wɛ ke debam zaane dé wo-dedoa kam ŋwaane. Konto to, dé jege teena we dé wó na paare Wɛ tei ne, ye ko pae debam wo pwoli lanyerane.

Debam ta na bwona ye dé ware dé jwoŋi de tete to, Yezu Krista tega maŋa kalo Wɛ boboŋa na kuri se o ma o jwoŋi wɛ-lwɛɛna ba wɛleera wone o yage to mo.

Yezu na tega ye o jana bam nwoŋi to mo pɛ dé na chega Wɛ yiga ne. Konto to, ko tiini ko ye chega we, o laam wó jwoŋi debam Wɛ ban-zɔŋɔ kom wone.

Nabiinu dedoa kam na ve Wɛ ni dem to mo pɛ se nɔɔna dedɛ tɔge o ŋwaane ba taa ye nɔn-chechɔgero. Nɔɔno dedoa kam nam na sɛ Wɛ ni to de wó pa se nɔɔna dedɛ taa jege chega Wɛ yiga ne.

Ko ta woli da, dé jege wopwolo lanyerane de Wɛ na zeini debam dé Teiru Yezu Krista ŋwaane to. Wonto mo pore chwoŋa se debam de Wɛ ba dé fɔge daane.