Popular Bible Verses from Gurim 9

Share

Nabiina balo na daare ye wonnu tem konto dam wo go-ba to maama nam wo sɛ se ba leiri ba wo de ba keim-balwaaro tem. Ba yɔɔre ba zuli wonnu telo ba tete jea na ke to mo. Ba ta zuli setaana, dedaane jwona yalo ba na mɛ sabu-seŋa, naa lu-nyenno, naa channa, naa kandwa, naa dɛ ba ma ke to mo. Jwona yam konto dwoŋi nam ba nae, ye ya kwori ya ba ni, ye ya ware ya vo de. Nɔɔna bam konto maa wo sɛ se ba leiri ba wo de ba nɔn-gora kam, de ba liri kikia yam. Ba ta maa wo yage ba bwoorim kikia yam de ba ŋweene dem.

Kayere laam ma nwoŋi nyoa kam wone se tu tega baŋa. Se ma jwoŋi dam se se donem taa wɔe, ne nɔŋɔ donem na ye tei to. Ba ma kaane-se se se yé chɔge logo baŋa gaaro de teeni, naa vɔɔro dwi maama. Se ma jwoŋi chwoŋa se se chɔge nɔɔna balo yerane na wo lage Wɛ gwona yam ba tira ne to.

Maleka kalo na ye banu tu wom to laam ma wu ka nabɔnɔ kom. Amo ma na chalechoa na kwori wɛyuu ne ka ba ka to logo baŋa ne. Ba ma kwei bwor-bu ba pa-ka se ka ma pore gwoŋ-chanluŋu kom ni dem.

Ba maa wo pɛ kayere sem chwoŋa se se go nɔɔna bam konto. Se nam nɛ chwoŋa se se pa nɔɔna bam yera mo taa wiira, se ko vo ko yi chane senu. Ba yera yam wó taa wiira ne nɔŋɔ donem na ye tei to mo.

Se maa jege pɛ se o taa nii se baŋa ne. Wonto mo ye maleka kam na nii gwoŋ-chanluŋu kom baŋa ne to. Ka yere de Juu tiina taane mo ye ‘Abadon’. Ka yere dem de Girisi tiina taane maa ye ‘Apolua’.