Popular Bible Verses from Efesia 4

Share

Ta‑á nege-na daane se á daare á ta‑á jege da-ŋwaŋa. Ta‑á ma‑á chɛ daane, ne Wɛ na yage á wɛleera o ma chɛ abam Yezu Krista ŋwaane tei to.

Ko maŋe se abam ta‑á gwooni á tete mo, se á ta‑á nege daane maŋa maama, se á daare á ta‑á jege ban-peno, ye á woli daane de swono.

Á yé pa se á ni taane taa jege lwarem. Nam ta‑á ŋɔɔne-na botare selo na wó fɔge nɔɔna ne ba na lage tei, ye se daare se zeini-ba lanyerane.

Yage-na puseŋa, de ban-lom, de wo-zɔŋɔ, se á daare á yage ni-kantɔgɔ, de toro, ko woli de keim-lwanno dwi maama.

Abam wolo ná jege ban-zɔŋɔ de o dwoŋi, se kotu yé pa ko ji wɛleere o tei ne. O nam jege se o le-de o wone lela ye wɛ daa ta wo zo. Á yé pa setaana pɛ na laŋa o chɔge abam.

Ba ma bere abam se á yage á ŋwe-dwoŋa kam de ka na pɛ á ye tei to. Á ŋwe-dwoŋa kam konto lage ka chɔge abam mo, de ka na gane abam se á fera taa zoore wo-yɔɔro telo na ba jege kuri to. Á boboŋa maama nam jege se ya pipiri ya ji nadoora mo, se á daare á tɔge Wɛ ŋwe-doŋa kalo o na ke o pa abam to. Ŋwe-doŋa kam konto nye de Wɛ tete ŋwea mo, ye ka pa á tɔge chega chwoŋa de wo-pwoŋo chwoŋa chekke.

Seene-na á yia se á ta‑á jege boboŋe dedwe, ne Wɛ Sin-laao kom na zeini abam ye á fɔge daane de bochare-zuru tei to.

Ko ye wonto tete nam mo woli nɔɔna de o pɛɛra yam, se ba badaara taa ye o totoŋa nakwa, se badaara de taa ye o ni-jwoŋina, se badaara de taa tɔɔle Wɛ kwor-ywoŋa kam, se badaara taa nii o nɔɔna baŋa ne, ye badaara de ba bere-ba o chega kam. Yezu Krista nam woli o nɔɔna bam konto dwoŋi se ba wane ba na dam mo se ba taa toŋe ba zeini daane, se ko pa o kɔgɔ kom maama fɔge ko ke daane lanyerane. Konto ŋwaane, debam maama laam wó ba dé taa ye bedwe, de dé na jege wo-dedoa de Wɛ Bu wom ye dé yei o chega kam tei to. Dé boboŋa laam maa wó tiini ya be lanyerane, se Yezu Krista ŋwea kam taa sui dé bochara maama.

Dé boboŋa daa bá taa bwona, nenɛɛne bu-balɛ boboŋa na ye tei to. Dé daa bá pa se dé boboŋa taa vei yiga de kwaga de nɔɔna berem, ne vio na fuli wonnu ko yage yiga de kwaga tei to. Dé daa bá sɛ dé tɔge nɔɔna balo na ke swa ba gane ba dwonna se ba tusi to. Dé nam wó taa bere Wɛ chega kam mo ye dé jege da-swono, se ko pa dé boboŋa kweere ye dé me de Yezu Krista na ye debam Yuu-tu to.