Popular Bible Verses from ရောမ 4

Share

ထာဝရဘုရား၏ ဂတိတော် အကြောင်းနပတ်သပ်ရို့ သူ့စိတ်မာ တစ်ခါလည်း မယုံသင်္ခါ မဖြစ်လီ။ ယင်းထက်ပင် သူ့မာ ကျုံခြင်းတရားစာ အရာလည်း ခိုင်မာရို့ ထာဝရဘုရား၏ ဘုန်းတန်ခိုးကို ချီမွမ်းလီရေ။ ကိုယ်ခံထားစာ ဂတိတော်အတိုင်း ထာဝရဘုရား လုပ်ပီးနိုင်ရေဆိုစာကို အာဗြဟံစာ အပြည့်အစုံ ကျုံလီရေ။

ကျမ်းစာမာ ရွီးရို့ ဟိရေ၊ “ငါ နင့်ကို လူမျိုး အများကြီးရို့မာ အဖ ဖြစ်စီဗျာ။” ထာဝရဘုရားစာ သီသူရို့ကို ပြန်ရှင်ထမြောင့်စီရေ အရာ တစ်ခုလည်း မဟိစာက ဖန်ဆင်းရေ။ အာဗြဟံစာ ထိုထာဝရဘုရားကို ကျုံလီရေ။

ငါရို့ အပြစ်အကြောင်းန အသီခံစီဖို့အတွက် ထာဝရဘုရားစာ ယေရှုကို သီခြင်းတရားအလက်မာ တင်အပ်လီရေ အရာ ငါရို့ကို သူတော်ကောင်းအဖြစ် လက်ခံဖို့အတွက် ယေရှုကို သီရာက ပြန်ရှင်ထမြောင့်စီလီရေ။

အာဗြဟံမာ သားသမီး ရဖို့ ဟို့ တစ်ခုလည်း မျှော်လင်းချက် မဟိလီ၊ ယေကေလည်း သူစာ ထာဝရဘုရားကို ကျုံရို့ မျှော်လင်းနီလီရေ။ ထာဝရဘုရားစာ သူ့ကို ပြောလီရေ၊ “နင့် အမျိုးအနွယ်သားရို့စာ ဂေါင်းခင်မာဟိစာ ကြယ်တိန အရှိရှိ ပွါးကတ်လိမည်။” ထာဝရဘုရား၏ စကားအတိုင်း အာဗြဟံစာ လူမျိုး အများကြီးရို့မာ အဖ ဖြစ်လာလီရေ။

ယင်းအတွက်န လူရို့စာ ကိုယ်ရို့မာ ကျုံခြင်းတရားကနီရို့ ထာဝရဘုရား၏ ဂတိတော်ကို ခံရကတ်တေ၊ အကြောင်းကား ထာဝရဘုရားစာ ထိုဂတိတော်ကို လက်ဆောင်အဖြစ် အခမဲ့ ပီးချင်လီရေ။ ယင်းအတွက်န အာဗြဟံန သူ့အမျိုးအနွယ်သားရို့ အားကုံးသူလည်း အခမဲ့ လက်ဆောင်အဖြစ် ထိုဂတိတော်ကို ခံရကတ်လိမည်။ ထိုဂတိတော်စာ သက်သက် ပညှတ်တရားကို လိုက်နာသူရို့ ခံရကတ်ဖို့စာ မဟုတ်။ ယင်းထက်ပင် အာဗြဟံပိုင် ထာဝရဘုရားကို ကျုံသူရို့ အားကုံးသူလည်း ထိုဂတိတော်ကို ခံရကတ်လိမည်၊ အကြောင်းကား အာဗြဟံစာ ဟိသမျ ကျုံသူရို့မာ အဖ ဖြစ်တေ။

ဒါဝိဒ်မင်းစာ ပြောလီရေ၊ “မတရားလုပ်ခြင်းက ခွင့်ရွှတ်ခြင်းကို ခံရသူရို့စာ မင်္ဂလာ ဟိကတ်တေ၊ အပြစ် ဖုံးထားခြင်းကို ခံရသူရို့စာ မင်္ဂလာ ဟိကတ်တေ။ အရာ အသူ့အပြစ်ကိုမဆို အသျှင်ထာဝရဘုရား မှတ်ရို့ မထားဆိုကေ သူစာ မင်္ဂလာ ဟိရေ။”

ကျမ်းစာမာ ရွီးရို့ ဟိရေ၊ “အာဗြဟံစာ ထာဝရဘုရားကို ကျုံလီရေအတွက်န ထာဝရဘုရားစာ သူ့ကို သူတော်ကောင်းအဖြစ် လက်ခံလီရေ။”