Popular Bible Verses from Romanos 1

Share

Ka'p u̶u̶ch je̱'e̱ Dios y'ayuuk tyu̶y'ajt nmu̶dzo'oydyuunu̶, je̱' ko je̱' je̱'e̱ Dios myu̶k'ajtu̶ñ, wan je̱'e̱ ja'ay ku̶xyu̶ pu̶njaty mu̶bu̶jkku̶xpu̶ñ je̱'e̱ aanu̶mu̶ ni'idzooku̶ñ paatku̶xu̶ch, timyjyayu̶jp je̱'e̱ judío ja'ay ajku̶xy y jak'u̶x'aam je̱'e̱ ka'pu̶ jyudíoja'ayu̶ch ajku̶xy.

Adaa Dios y'ayuuk tyu̶y'ajt xyajnejwu̶u̶yu̶mb neby je̱'e̱ Dios nnu̶u̶ nboky xywyinmé̱kxu̶yu̶ ajtu̶m ajku̶xy; xywyinmé̱kxu̶py je̱'e̱ nnu̶u̶ nboky ajtu̶m ajku̶xy je̱' ko nmu̶bu̶jku̶m ajku̶xy, y je̱'e̱du̶'ajty ko nmu̶bu̶jku̶m ajku̶xy. Du'un je̱'e̱ Dios ñaky myu̶na'añ: “Je̱'e̱ wa'adzja'ay tzu̶na'awu̶p je̱'e̱ wiinu̶u̶xu̶u̶ mu̶u̶d je̱'e̱ mu̶bu̶jku̶ñ mu̶dyiibu̶ myu̶u̶du̶ñ.”

Je̱'e̱ mu̶dyiibu̶ ka'p n'ijxu̶m ajku̶xy ma je̱'e̱ Diosu̶ñ mu̶baad je̱'e̱ nnejwu̶u̶yu̶m ajku̶xy, pu̶nu̶ nyajmiin nyajme̱jtzu̶mby je̱'e̱ njoot nwinma'añ ajtu̶m ajku̶xy ko n'ijxu̶m ajku̶xy je̱'e̱ mu̶dyiibu̶ tu̶ tuñu̶ñ. Mu̶naaba je̱'e̱ Dios naaxwiimbu̶ yajkojyu̶ñ ni'igu̶xu̶'kp je̱'e̱ du'un oy yajxón, ko je̱' Dios y ko je̱'e̱ myu̶k'ajtu̶ñ ka'p nimu̶naaxu̶u̶ kyú̶xu̶ch tyu̶góyu̶ch. Paady je̱'e̱ ju̶bu̶kja'ay axu̶u̶gja'ay ka'p wyinmajtzu̶gu̶xyu̶ yajwinmé̱kxku̶xu̶ch.

Oy du'un tu̶ ja'anejwu̶u̶ygyu̶xy ko je̱'e̱ Dios jyiiju̶ch, peru̶ ka'p tu̶ yajmu̶j'ajtku̶xy neby je̱'e̱ Diosu̶ñ ni ka'p je̱'e̱ Dioskujuuyu̶p tu̶ mooygyu̶xy. Je̱' je̱'e̱ je'eyu̶ wyinmaay'anajxku̶xypy je̱'e̱ tzuuwinma'añ ka'pu̶ chobaady, y je̱'e̱ xye̱xjoot xye̱xwinma'añ ajku̶xy ju̶bu̶ktuum je̱'e̱ tu̶ kya'anu̶.

Chi ka'p je̱'e̱ Dios tyu̶y'ajt mu̶jpu̶daaku̶ ajku̶xy, je̱' je̱'e̱ yajmu̶jtu̶gu̶u̶ygyu̶xypy je̱'e̱ ja'ay y'anu̶u̶mu̶dya'aky ajku̶xy, y je̱' tu̶ mu̶jpu̶daakku̶xy y tu̶ windzu̶gu̶u̶ygyu̶xy je̱'e̱ mu̶dyiibu̶ je̱'e̱ Dios tu̶ yajkojyu̶ñ, y ka'p jye̱'e̱ju̶ch je̱'e̱ Dios je̱'e̱ mu̶dyiibu̶ tu̶ yajkoju̶gu̶xyu̶ñ y mu̶dyiibu̶ paattu̶bu̶ñ windzu̶gu̶u̶y o'owu̶dajtku̶xu̶ch wiinu̶u̶xu̶u̶ wiinu̶u̶tiempo. Jaanch adaa du'un.

Nejwu̶u̶yu̶mby ko jiiby tzajpjooty je̱'e̱ mu̶jtzaachpyu̶ chooñ mu̶dyiibu̶ je̱'e̱ Dios kyejxypyu̶ñ ma je̱'e̱ ja'ay ku̶xyu̶ mu̶dyiibu̶ ju̶bu̶k axu̶u̶g ja'ay'ajtku̶xpu̶ñ y mu̶dyiibu̶ ka'p tyu'uda'agyu̶chu̶ñ ajku̶xy, je̱' ko mu̶u̶d je̱'e̱ ju̶bu̶k axu̶u̶g ja'ay'ajtu̶ñ je̱'e̱ Dios tyu̶y'ajt mu̶u̶d agapxtujku̶ ajku̶xy neby kya'ayajnejwu̶'u̶wu̶chu̶ñ.

Paady je̱'e̱ Dios tu̶ ñajtz'ixu̶u̶yu̶gu̶xnu̶ ma je̱'e̱ oycho'oydyuunu̶ba winma'añdyu̶ñ. U̶xtu̶ je̱'e̱ tyo'oxyu̶jk je̱'e̱ to'oxyu̶jk'adyiibyu̶ tu̶ yajtu̶gajtzku̶xnu̶ y'adu̶u̶tzku̶xnu̶ neby ka'p pyadyiiju̶ñ, nandu'un je̱'e̱ ya'aydyu̶jktu̶jk, tu̶ je̱'e̱ ya'aydyu̶jk'adyiibyu̶ yajtu̶gajtzku̶xnu̶ neby jya'apadyiiju̶ñ mu̶dmaagu̶xu̶ch mu̶dpókxku̶xu̶ch je̱'e̱ tyo'oxyu̶jk ajku̶xy, y amíñ u̶xyu̶py je̱'e̱ ñayñijoot'ajtu̶gu̶xyu̶ ñaymyu̶dma'awaan ñaymyu̶dpokxaanu̶gu̶xy. Agu̶ ya'aydyu̶jk je̱'e̱ ñaymyu̶dmaawu̶gu̶xy y y'adu̶u̶tzku̶xy oycho'oydyuunu̶, y du'un je̱'e̱ kyu̶'u̶mni'kx kyu̶'u̶mgópt du'un tzaachpyu̶ mooygyu̶xy ko du'un tyuundu̶gooygyu̶xy. Je̱' ko ka'p je̱'e̱ Dios ku'ubu̶gaangu̶xy, paady je̱'e̱ Dios tu̶ ñajtz'ixu̶u̶yu̶gu̶xy ma je̱'e̱ jyu̶bu̶kjoot jyu̶bu̶kwinma'añ ajku̶xyu̶ñ, wan ju̶bu̶k axu̶u̶g y'adu̶u̶tzku̶xu̶ch neby ka'p pyadyiiju̶ñ y'adu̶u̶tzku̶xu̶chu̶ñ.

Je̱' du'un je̱'e̱ myu̶naangu̶xy ko kyuwinma'añdyu̶ch ajku̶xy, peru̶ janch tzuu je̱'e̱ ajku̶xy; tu̶ je̱'e̱ Dios y'oy'ajtu̶ñ yajtu̶gajtzku̶xnu̶, je̱'e̱ Dios ka'pu̶ y'o'ogy, y yajmu̶jtu̶gu̶u̶ygyu̶xnu̶ je̱'e̱ ja'ay y'awinnax ajku̶xy, je̱'e̱ ja'ay mu̶dyiibu̶ o'kp tu̶gooybyu̶ñ, u̶xtu̶ je̱'e̱baad tu̶ yajmu̶jtu̶gu̶u̶ygyu̶xnu̶ je̱'e̱ joon muuxy y'awinnax ajku̶xy, je̱'e̱ no'on ju̶yujk mu̶dyiibu̶ kyu̶'u̶ tyeky mu̶daaxk ajku̶xyu̶ñ y je̱'e̱ tza'añ ju̶yujk ajku̶xy.