Popular Bible Verses from 1 Pedro 1

Share

Tzuk je̱'e̱ Dios, je̱'e̱ Windzú̶n Jesucristo tyeedy, u̶u̶baat kapxpaattu̶ ajtu̶m ajku̶xy, je̱' ko mu̶u̶d je̱'e̱ myu̶jpa'a''ayoowu̶ñ je̱'e̱ njoot nwinma'añ tu̶ xyajwinje̱e̱mu̶ ajtu̶m ajku̶xy ko je̱'e̱ Jesucristo jyuugypyu̶jky. Y adaa du'un xi'ig xon xyajju̶jp'ijxu̶mb ajku̶xy ko je̱'e̱ aanu̶mu̶ ni'idzooku̶ñ nbadaanu̶m ajku̶xy, y nan xymyooygyu̶xu̶p mu̶dyiibu̶ je̱'e̱ Dios jiiby tzajpjooty ni'ixu̶'u̶ myu̶dajtypyu̶ñ, je̱'e̱ mu̶dyiibu̶ ka'p wyindu̶goyu̶ñ, je̱'e̱ mu̶dyiibu̶ ka'p jyu̶bu̶kku̶'u̶y y je̱'e̱ mu̶dyiibu̶ ka'p ñikxyu̶ñ.

Paady miich jootkujk m'ijtku̶xy, oy je̱'e̱ tzaachpyu̶ du'un tzojku̶ mu̶j may m'okja'apaat m'okja'a'ijxku̶xy. Je̱' ko du'un miich je̱'e̱ mmu̶bu̶jku̶ñ ajku̶xy neby je̱'e̱ ooru̶ju̶ñ. Je̱'e̱ ooru̶ yaj'ijxmajtzp je̱' mu̶u̶d je̱'e̱ ju̶u̶n pu̶nu̶ jaanch wya'adz ooru̶ju̶ch. Je̱'e̱ mu̶bu̶jku̶ñ mu̶dyiibu̶ je̱'e̱ tzaachpyu̶ ayo'on mu̶madaakp mu̶j je̱'e̱ ni'igyu̶ chobaady ni'igu̶ ka'p je̱'e̱ ooru̶ mu̶dyiibu̶ windu̶gooybyu̶ñ. Y du'unu̶tz miich je̱'e̱ mmu̶bu̶jku̶ñ ajku̶xy ko naty du'un tu̶ y'ok'yaj'ijxmach, winmajtzu̶gu̶xp je̱' mu̶j y'ídu̶ch ku'umáy y windzu̶gu̶'u̶y ko naty je̱'e̱ Jesucristo ya naaxwiiñ ja'adu'ook wyimbity.

Ni'igyu̶ miich oy wa'adz tzu̶naay juugy'ajtku̶x je̱' ko wa'adz je̱'e̱ Dios mu̶dyiibu̶ miich tu̶ xywyin'ijxku̶xyu̶ñ, je̱' ko du'un je̱'e̱ Dios ñaky myu̶na'añ: “Mu̶dajtku̶x je̱'e̱ mjoot mwinma'añ oy wa'adz du'un neby u̶u̶ch je̱'e̱ njoot nwinma'añ oy wa'adz nmu̶datyu̶ñ.”

Yajmu̶gápxku̶x du'un neby je̱'e̱ ung ana'k mu̶dyiibu̶ yajmu̶gápxku̶xpu̶ñ, ka'p du'un m'oktzu̶naaygyu̶xnu̶ neby ijty jeky'ajty mdzu̶naaygyu̶xyu̶ñ, mnijoot'ajtku̶xy je̱'e̱ ju̶bu̶kjoot ju̶bu̶kwinma'añ ma je̱'e̱ Dios y'ayuuk tyu̶y'ajt najty ka'p mnejwu̶u̶ygyu̶xyñu̶ju̶ñ.

Paady ni'ixu̶'u̶ ijtku̶x ma je̱'e̱ mjoot mwinma'añ ajku̶xyu̶ñ y wijy kejy. Ju̶jp'ijxku̶x tu'ug'aa tu'ugjoot mu̶dyiibu̶ je̱'e̱ Windzú̶n Jesucristo mu̶u̶d je̱'e̱ y'oyjya'ay'ajtu̶ñ xymyo'owaangu̶xpu̶ñ ko naty ja'adu'ook myiñ.

Je̱' ko du'un je̱'e̱ Dios ñaky myu̶na'añ: “Ku̶xyu̶ je̱'e̱ ja'ay du'un je̱' neby je̱'e̱ ujtzu̶ñ, y je̱'e̱ myu̶j'ajtu̶ñ du'un je̱' neby je̱'e̱ pu̶jyu̶ñ. Je̱'e̱ ujtz tu̶u̶tz je̱' y je̱'e̱ pyu̶jy ka'anu̶py je̱'. Peru̶ je̱'e̱ Windzú̶n Dios y'ayuuk tyu̶y'ajt wiinu̶u̶xu̶u̶ je̱'e̱ y'ijtu̶y y ka'p nimu̶naaxu̶u̶ kyu̶xy tyu̶goy.” Y adayaaba ayuuk tu̶y'ajt, je̱'e̱ ayuuk tu̶y'ajt adaa, je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, je̱'e̱ mu̶dyiibu̶ miich tu̶ mmu̶doy'ajtku̶xyu̶ñ.