Popular Bible Verses from อาอีซายัะ 53

Share

มาแล, โกบ หมาบ ปี โบง เอ, อัน วี คัม อี ซัด อัน, แตห อึณ แบน ดีม อี เซา กาเซา ดี อัน. โกบ หมาบ ปี โบง เอ, อัน บอ คัม อี มัห อัน กอ มายัม บอ โดว. โกบ แฮะ คัม อัน โวด เฆ อาแบรด ตี, เอ วี ปึอน ดี กอย ฆัด เฆียด ฆยามซา. โกบ แฮะ คัม อัน อี ซีเบรียะ อัน, อึณ วี แตห เอ วี แกน บอ ปึอน กอย ดาคึย.

แคะ กอย เอ ดูอี บอกาเฆลียด, เอ แฮะ ปี มาบู อี แฮะ โบยห โกบ วัห เอ อึณเตณ, บอ วี โดบ ปี อึง เอ ราง อาเซ ราง อัน. มาแล, เฌาพรา แฮะ วี แตห อัน คัม โตต อาแบรด ปี โลว คัม เอ.

มาแล, อัน แฮะ คัม โตต เซา รอฆา ปี โลว คัม เอ. อัน มืร แฮะ คัม โตต ดูก เฆ หณาบ ปี โลว คัม เอ. อัน ปี บอ แฮะ ปาย ตี มืร, เอ ยี วี มาด ปี คัม อัน ตี, อึณ มูห โกบ แฮะ ดัม เฌาพรา หมาบ ดี อัน.

เฆ ดูอี มืร ตู โรวเซ อัน บอ แวน อัน, แตห อึณ วี เซา ดี น็อห อัน. อัน บอ คัม ดูก เฆ หณาบ อี กืน กาเซา. เอ มืร ตู ซี ยอด ซี ยึร อัน. เฆ บอ กาอีห อัน. อึณ มืร ตู มึห อาเซ อี รีมาด อัน.

อัน ปี บอ แฮะ คัม อี คาหนาบ กาเซา อัน มืร, อัน ยี มึห น็อห อึณจูะ อึณจัม, มึห น็อห โฆม น็อห เตียม บอ คัม ดี ยืน ตู โฆรห คอ อู แด. อัน แฮะ ปี มาบู ปี ดี ฮาว ง็อห ยัม อี บอ ปี ดี กับ อี ฮึก อัน. อัน ยี กอย หนีม หนีม, ตู ฮัม ตู ดัด.

เฌาพรา ยี แฮะ อึง แดเจณ อัน อี แฮะ คัม ดูก ฌึร ตี. วาย แฮะ ฮอต ยัม อัน, แตห อึณ แบน ปี ดี หลู อี ฆ็อห แวน หมาบ, อัน ดี วี มึห หลูกหลาน. อาซาก อัน มืร ดี โต็ง. แคะ แฮะ คราม เฌาพรา ดี โบง, อึณ ดี บอ แบน โตต ดอน โมยว โกบ แปะ แฮะ โบง แดเจณ อัน ตี.

โคว, ดูอี ปี ซูต ปี จัร อัน เฌา, อัน ดี โบว แบน ปี เฮ อี ปูะ เลห แคง กาดาย กาฮ็อห. อารึบ อัน ตู ชีด มาเซ. ดอ ยึร เอ ดี อัน, อัน ตู หมึอม ยอด, ตู แตห เอ มึห น็อห ซี ปึอน.

โกบ อึณ ปาย ตี โอว ดี วี อืบ มยูก อัน, แตห อัน วี แบน อี ตาง อี มึห อาพูง ดังโคว. อัน ดี วี ปึอน รูห อัน ปี ดา ซึก อี ลาย กาซาง โกรว แปะ แฮะ พาด เฆ. โคว, อัน มึห น็อห ซาทา, แฮะ หลู อาซาก อัน กาดาง เฆ ดูอี อี โบง นา ตู หมึอม. อัน มืร แฮะ ฮอต คัม หมาบ ดาง เฆ ดูอี กืน บอ วี ซาคึร แตห เฆ ลอด คัม หมาบ เฆ.”

เฌาพรา ปี วี ต็อห, “วาย แฮะ ฮอต คัม แดเจณ โอว ดูก ตาง ตี, น็อห อัน ดี วี โบยว ดาคึย. น็อห อัน ดี วี นับ ดูก ตาง ปี คัม อัน ตี, อัน ตู คัม ดีโลย ดีลาย. แดเจณ โอว อี มึห น็อห ซืร น็อห หมาน อี ล็อะ น็อห โอว ตี, อัน แฮะ ฮอต ดึห ฮาว โตต แคะ กอย หมาบ เฆ ดูอี กืน, วี คัม หมาบ เฆ ตี, แตห เฆ บอ ปึอน น็อห ซืร น็อห หมาน.

อัน ปี บอ แฮะ คัม อี เหมต ฮาว ง็อห ยัม มืร, อาว มึห อี จอย อัน. อัน แฮะ ยัม โกบ หมาบ เฆ ดูอี ปี อึบ โอว อี มูห เฌาพรา.

ดอ ยัม อัน เฆ วี ฮาว ดีบ อัน โดบ เฆ ดูอี มึห หมาบ บอ ดูอี ฮาย ดูอี มืก. มาแล, อัน ยี ตู ดึอม โบง ลูต คอ อู โมยว, ตู ดึอม กาลาง โฆรห ตู หมาน คอ อู แด.