Popular Bible Verses from SHINGRAN 8

Share

Bai, sanit ngu na dazik hpe Sagu Kasha hpaw dat wu yang, sumsing lamu e hkying hkum chyen mi daram atsin sha rai nga ai.

Ya, shawng na lamu kasa gaw shi a pahtau dum dat wu ai: Shaloi asai hte gayau ai sin hte wan ga ntsa de htu ru hkrat wa ai; dinghta ga htam masum hta na htam mi hkru mat wa ai; nam maling hpun ni mung, tsit lali ai tsingdu yawng hte mung, htam masum hta na htam mi hkru mat wa ai.

Dai hpang, ngai yu dat yang, lamu a ka-ang hpatwat e pyen yawn nga ai galang langai mi gaw, “Hkrit hpa dingnye! Hkrit hpa dingnye! Kaga lamu kasa masum dum dat na ra ai pahtau nsen ngoi pru ai shaloi, dinghta ga e nga ai ni yawng a matu, gade hkrithpa dingnye rai na rai hka!,” nga nna nsen kaba hte jahtau nga ai gaw, ngai na nngai.

Bai, lahkawng ngu na lamu kasa gaw shi a pahtau dum dat wu ai. Shaloi, wan hkru grung nga ai zawn san ai bum kaba langai mi hpe panglai de jahkrat dat wu ai. Dai rai nna panglai htam masum hta na htam mi, asai tai mat wa ai.

Bai, masum ngu na lamu kasa gaw shi a pahtau dum dat wu ai: Shaloi, shanan zawn tu grung nga ai shagan kaba langai mi lamu de na di hkrat wa nna, hka nu ni htam masum na htam mi hte hka hpawk hka npun ni a ntsa e hkrat taw nga ai. (Dai shagan a mying gaw, “Hka ai” ngu ai rai nga ai; hka htam masum hta na htam mi hka mat ai rai nna, dai hka ai hka lu ai masha ni law law wa si mat wa ma ai.

Bai, mali ngu na lamu kasa gaw shi a pahtau dum dat wu ai. Shaloi, jan a htam masum na htam mi, shagan ni htam masum a htam mi grawp hten nip mat wa nna, shanhte a nhtoi gaw htam masum na htam mi sin mak mat wa ai hte, shani a htam masum na htam mi, shana a htam masum na htam mi nhtoi n lu mat ai.