Popular Bible Verses from Efesios 6

Share

Chi ntu kántáꞌán‑ó jín ñɨvɨ ñunéꞌyúꞌ, chisaꞌ kántáꞌán‑ó jín rá ta̱chi̱ꞌ kíni rá kúñáꞌnú, jín rá nísotíñú, jín rá i̱toꞌoꞌ ñáꞌnú ka̱ꞌ ya̱ jíka ráa nu̱u̱nꞌ neenꞌ jee tátúníꞌ ráa nu̱u̱nꞌ ñɨvɨ ñɨ̱vɨ́ yaꞌá. Chi kántáꞌán‑ó jín rá ta̱chi̱ꞌ kíni ya̱ jíkanuun ráa súkún.

Jee íyó kaꞌanꞌ rán jín Ndiosíꞌ jee ka̱ka̱nꞌ táꞌvíꞌ rán nu̱u̱nꞌ re̱ꞌ, ntáká tiempúꞌ. Kaꞌanꞌ rán jín Ndiosíꞌ sáni chíneí Ta̱chi̱ꞌ Ííꞌ re̱ꞌ ránoꞌó. Jee nito koo rán kunikɨnꞌ ni̱ꞌin rán ka̱ka̱nꞌ táꞌvíꞌ rán jie̱ꞌe̱ꞌ ntáká inka rá ñɨvɨ ya̱ nsásɨ́ɨ́n Ndiosíꞌ kuvi ráa ñɨvɨ re̱ꞌ.

Íyó satúꞌva rán maárán jín ntáká ya̱ táji Ndiosíꞌ nu̱u̱nꞌ rán sáva nama rán maárán, kuéntáꞌ kua̱ꞌ sátúꞌva ɨɨn soldado maáa ya̱ kɨ̱kantáꞌán‑a. Sáva kúvi kuiñɨ ni̱ꞌin rán nama rán maárán nu̱u̱nꞌ tiñu máñáꞌ ñúꞌún iniꞌ kui̱ꞌna̱ꞌ kúñáꞌnú saꞌá‑a.

Saáva satúꞌva rán maárán jín nɨꞌɨ ya̱ táji Ndiosíꞌ nu̱u̱nꞌ rán sáva nama rán maárán, kuéntáꞌ íyó soldado ya̱ sátúꞌva re̱ꞌ jín rá nantíñú re̱ꞌ, sáva kúvi kuneí rán kuiñɨ ni̱ꞌin rán ki̱vɨ̱ꞌ kákini kenta, jee sáá nkuvi nsa̱ꞌá rán nɨꞌɨ, jee kuiñɨ ni̱ꞌin rán.

Soo ya̱ ñáꞌnú ka̱ꞌ ví ya̱ kúneí iniꞌ rán Cristo, jee kuvi kasɨꞌ rán nu̱u̱nꞌ ntáká ya̱ chúichí maá ya̱ kíni kúñáꞌnú. Chi ya̱ kúneí iniꞌ rán Cristo kúvi kuéntáꞌ escudo rán, kuéntáꞌ escudo ya̱ ínaꞌá soldado sáva jiásɨ́ꞌ‑ɨ maáa nu̱u̱nꞌ ntáká flecha tɨ́ɨn ñuꞌunꞌ jee xináꞌváꞌ‑a vá. Jee kuiñɨ ni̱ꞌin rán jín ya̱ xinánitáꞌvíꞌ Ndiosíꞌ yó, chi yukuán kúvi kuéntáꞌ ɨɨn ti̱kokoꞌ ka̱a ya̱ ñúꞌún xi̱ni̱ꞌ ɨɨn soldado ya̱ náma‑a xi̱ni̱ꞌ‑i. Jee kuatíñú rán Tu̱ꞌun Ndiosíꞌ, ya̱ ntaji Ta̱chi̱ꞌ Ííꞌ re̱ꞌ nu̱u̱nꞌ‑ó kuéntáꞌ ɨɨn yuchiꞌ espada ya̱ jiátíñú rá soldado nu̱u̱nꞌ kántáꞌán ráa.

Jee saáva kuiñɨ ni̱ꞌin rán satúꞌva rán maárán kukutú rán jín tu̱ꞌun na̱a̱ꞌ Ndiosíꞌ, jee yukuán kúvi kuéntáꞌ núꞌníꞌ kutú va̱ꞌa chi̱ji rán. Jee ñúꞌún kutú iniꞌ ánímaꞌ rán ya̱ kínóo na̱a̱ꞌ rán nu̱u̱nꞌ Ndiosíꞌ. Sukuán sikútú rán maárán kuéntáꞌ nákúꞌun ɨɨn soldado saꞌma ka̱a‑a sáva náma‑a maáa sáá kɨ̱kantáꞌán‑a. Jee satúꞌva rán maárán sáva kachitu̱ꞌún rán tu̱ꞌun va̱ꞌa jie̱ꞌe̱ꞌ Jesús ya̱ sáꞌá‑a ya̱ kino̱o va̱ꞌa iniꞌ ñɨvɨ nu̱u̱nꞌ Ndiosíꞌ. Sukuán kúvi kuéntáꞌ náchiꞌi soldado ni̱jia̱nꞌ jie̱ꞌe̱ꞌ‑e sáva kene‑e kɨ̱kantáꞌán‑a.

Jee íyó inka ka̱ꞌ jie̱ꞌe̱ꞌ tu̱ꞌun kachiꞌ ni nu̱u̱nꞌ ránoꞌó, rá ñaniꞌ ni̱ꞌ jín rá ku̱ꞌva ni̱ꞌ ya̱ yɨ́ꞌɨ́ rán nu̱u̱nꞌ Cristo, íyó koo neí iniꞌ rán jie̱ꞌe̱ꞌ yɨ́ꞌɨ́ rán nu̱u̱nꞌ I̱toꞌoꞌ‑ó, jee nachuꞌun neí rán iniꞌ rán jín fuersáꞌ ííꞌ mánasɨ́ ni̱ꞌin níso re̱ꞌ.

“Koo ya̱ ñáꞌnú nú nu̱u̱nꞌ tátáꞌ nú jín nu̱u̱nꞌ nánáꞌ nú.” Tu̱ꞌun yaꞌá ya̱ nta̱túníꞌ Ndiosíꞌ kúvi tu̱ꞌun xíꞌnañúꞌún ya̱ níso tu̱ꞌun ya̱ nchi̱sóyuꞌú re̱ꞌ ya̱ ku̱ꞌva re̱ꞌ ɨɨn ta̱ꞌvi̱ꞌ nu̱u̱nꞌ ráa retú sikúnkuvi maa. Tu̱ꞌun ya̱ nchi̱sóyuꞌú re̱ꞌ ví yaꞌá: “Sáva kɨ̱ꞌɨ̱nꞌ va̱ꞌa jín nú jee sáva kutekuꞌ naꞌán nú nu̱u̱nꞌ ñɨ̱vɨ́ yaꞌá”, nkachiꞌ Ndiosíꞌ.

Ránoꞌó ñɨvɨ súchí jiáꞌnu jiáá jín rá súchí lúlí íyó kaníjiá rán tátáꞌ rán jín nánáꞌ rán, chi yɨ́ꞌɨ́ rán nu̱u̱nꞌ I̱toꞌoꞌ‑ó, chi na̱a̱ꞌ kúvi ya̱ sáꞌá sukuán.