Popular Bible Verses from Ibr. 4

Share

Sipuririmanua le tiboiet Taikamanua samba mabaje samba makope lauru, bele pei palittei, samba makeru ikokom, pat pasaraakenangan enga ka ketsat, pauilakat ka unou tolat, samba iagai masipabaggei sibongan baga samba isiat paatuat.

Oto kauan ka emen baga talegeri kam uddenan pukilibat baga, bule tasilo puuktungan samba tasese kiliu baga, ibara paroman ka sita ka teterenia.

Aipoi Imam Sabeuta ta sitaiagai masiorik pugulaiatta; silepa sibo le nia, ka bagat sangamberinia makere kele sita, sarat jo le ta anai.

Ta anai beri sara sibaraakenen simalilipput ka matania, aipoi sangamberinia le bulutut samba matoila ka matania; ka tubunia le tapasialegi.

Aian poi ka sita Imam Sabeu Sipulubeunan, sigejengi sangamberi sorga, ia te Jesus, Togat Taikamanua, oto kauan imaron taukkaake pasimunengan tonem bagata.

Oto kau tabesiake kam tuguru ka puariat nenda, bui bara kasei pa sibebele kalulut masitutnake taimareddet nenda.