Popular Bible Verses from Ibrani 13

Share

Jang kamong mata kepeng, mar musti puas deng apa yang kamong pung. Barang, Allah sandiri su bilang kata, “Beta seng parna kasi tinggal ale deng seng parna kasi biar ale sandiri.”

Yesus Kristus tu seng parna baroba dari dolo, sakarang, sampe tarus-tarus.

Tagal itu, katong barani bilang bagini, “Tuhan tu yang salalu tolong beta, jadi beta seng taku. Manusia seng bisa biking apapa beta.”

Deng jang lupa biking apa yang bae par orang laeng. Kalo dong ada parlu apapa bagitu, tolong dong jua. Tagal samua yang kamong biking tu korbang yang biking Allah pung hati sanang.

Basudara e! Tagal Yesus su jadi korbang par tabus katong dari katong pung dosa, katong seng parlu kasi korbang binatang lai biar Allah tabus katong dari katong pung dosa. Jadi, mari katong puji-puji Allah tarus deng mangaku kalo Antua tu Tuhan. Itu tu korbang yang katong kasi par Antua.

Kamong samua musti taru hormat par janji kaweng yang kamong su ika. Laki deng bini seng bole kasi kotor dong pung tampa tidor. Itu pung arti, dong seng bole maeng serong tagal Allah nanti hukum orang yang tidor deng orang yang bukang dia pung laki ka bini.

La kalo ada orang yang kamong seng kanal yang parlu par manumpang, jang lupa tarima dia di kamong pung ruma. Barang deng biking bagitu, ada babarapa orang yang seng sadar su tarima malekat-malekat di dia pung ruma.

Waktu Yesus mati, Antua pung dara su tatumpa par kasi sah janji yang Allah ika deng katong tarus-tarus. Allah su kasi hidop katong pung Tuhan Yesus kombali, la Antua su jadi Orang Jaga Domba yang Paleng Hebat par katong yang jadi Antua pung domba-domba ni. Jadi beta minta biar Allah, yang su biking katong pung hati dame tu, kasi apa sa yang bae yang kamong parlu par biking Antua pung mau. Beta jua minta biar lewat Yesus Kristus, Allah karja dalang katong pung hati par biking apa sa yang biking Antua pung hati sanang. Mari katong puji-puji Yesus Kristus tarus-tarus! Amin.