Popular Bible Verses from 1 Tesalonika 5

Share

Kamong pung hati musti paleng sanang tarus. Jang pamalas sombayang. Sombayang siang-malang. Minta dangke dari Allah par samua yang jadi dalang kamong pung hidop hari-hari. Barang, Allah mau kamong biking bagitu tagal kamong su satu hati deng Yesus Kristus.

Basudara samua yang iko Yesus e! Beta, Silas, deng Timotius sombayang biar Allah yang biking katong hidop dame tu biking kamong batul-batul jadi Antua pung orang-orang yang iko Antua pung mau. Katong jua minta Antua jaga kamong pung hati, nyawa, deng badang biar waktu Yesus Kristus, Tuhan yang katong somba, bale kombali, kamong seng bardosa. Allah yang panggel kamong par jadi Antua pung orang-orang yang seng bardosa, deng katong parcaya kata Antua nanti biking bagitu tagal Antua salalu biking apa yang Antua bilang.

Jaga biar seng ada yang balas kajahatang deng kajahatang, mar usaha tarus par biking yang bae par orang-orang yang parcaya Yesus deng samua orang laeng lai.

Jadi, kamong musti baku kasi nasehat deng baku bantu biar kamong labe tamba parcaya macang deng apa yang kamong ada biking tu.

Basudara, kamong musti tagor orang-orang yang pamalas karja. Kasi kuat orang-orang yang pung hati takotang. Tolong orang-orang yang seng kuat. Sabar deng samua orang.

Allah pili katong bukang par hukum katong, mar par kasi salamat katong, la katong salamat tagal Tuhan Yesus Kristus yang katong somba.

Mar basudara yang iko Yesus, waktu Tuhan Yesus bale kombali, kamong seng takajo macang deng tuang ruma yang tidor mati tenga malang waktu pancuri maso. Mar kamong su siap waktu Tuhan Yesus bale kombali, tagal kamong seng hidop sama deng orang-orang yang seng kanal Tuhan. Dong tu macang deng orang yang hidop dalang galap. Mar kamong samua hidop iko Antua pung mau, macang deng orang yang hidop dalang tarang. Katong seng hidop dalang galap.