Popular Bible Verses from Filipi 2

Share

Ano o maamaanto a dmak i, aka ka o misatkeday, aka ka o mipasnengay ko dmak namo. Ka o misapo^neray ko faloco' namo. Ikakaay no mako ko tao, han ko faloco' namo a masasingodongodo. Aka ka o dmak no tireng a ccay ko haharatengen. Halo no taoen a dmak a miharateng.

Samatiyaen o faloco' ni Kristo Yis ko faloco' namo.

Talacowa o Kawas ko pinangan Ningra, nikawrira, haenento Ako to no Kawas a milcad a citodong to micidekay a sakowan, caay ka saan. Sawaden Ningra ko no tireng a dmak, palakolien Ningra ko tireng Ningra a palcad to no tamdaw. Miringi to tireng no tamdaw Cingra a talahkal. Sapo^neren Ningra ko faloco'. Tangasa i nika patay Ningra i ciwcika ko nipihaklong Ningra to nafaloco'an no Kawas.

Nawhani mararid ko Kawas a matayal i faloco' namo a pafaloco' a papilahci to nafaloco'an Ningra.

Onini ko saka pacakaten no Kawas ci Kristo a palasakakaay. Mapangangan no Kawas Cingra to satadamaanay a ngangan. Saka, o mamipitosor ko i kakarayanay ato i hkalay ato i lalinikay no sra a ma'oripay a ma^min a mita'ong ci Yisan. O papatalahkal ko tamdaw a ma^min to nika o Tapang ci Yis Kristo saan a pahmek to Wama a Kawas.

I tini i masamaamaanay a dmak i, aka ka ngaliwngiw. Aka ka laliyaliyang kamo. Ta tingalaw ko faloco' namo, awaay ko raraw namo, o masongila'ay a wawa no Kawas kamo a mikapot to aniniay a tatiihay ko faloco' a ciraraway a tamdamdaw i tini i hkal. Kamatiya o fo'is kamo a matdi i tini i hkal

Orasaka, kaolahan ako a salikaka, samatiyaen o ha:tiniay ko nipihaklong namo i takowanan. Aka ka itiya i nika iraan ako a ccay. Ano awaawa kako anini i, ikakaen ko nipihaklong namo. Ka o nano ngodo no faloco' namo ko sakapisa'icel namo a milahci to tayal no Kawas a pa'orip tamowanan.