Popular Bible Verses from Ihāia 43

Share

Tēnei ahau te mahi nei i te mea hou; ākuanei te tupu ai; e kore rānei e mōhiotia e koutou? Ka oti i ahau he ara i te koraha, he awa i te tītōhea.

Ka haere koe i roto i te wai, ko ahau hei hoa mōu; i ngā awa anō, e kore e huri mai ki runga i a koe; ki te haere koe i roto i te ahi, e kore koe e wera, e kore anō te mura e kā ki a koe.

“Kaua e mahara ki ngā mea ō mua; ko ngā mea onamata kaua e whakaaroa.

Nā ināianei, ko te kupu tēnei a Ihowā, a tōu kaihanga, e Hākopa, a tōu kaiwhakaahua, e Īharaira: “Kaua e wehi kua oti nei hoki koe te hoko e ahau; kua karangatia e ahau tōu ingoa; nāku koe.

I te mea he taonga nui koe ki tāku titiro, he mea e whakahōnoretia ana, ā, i arohaina koe e ahau; mō reira ka hoatu e ahau he tangata mō tōu tūranga, he iwi hoki hei utu mōu kia ora.

Ko Ihowā hoki ahau, ko tōu Atua, ko te Mea Tapu o Īharaira, ko tōu kaiwhakaora; i hoatu e ahau a Īhipa hei utu mōu, a Etiopia rāua ko Tepa hei wāhi mōu.

Kaua e wehi; kei a koe nei hoki ahau: ka kawea mai e ahau ōu uri i te rāwhiti, ka kohikohia mai koe i te uru.

“Ko ahau, ko ahau nei anō, te kaimuru atu i ōu hē, he whakaaro anō ki ahau; e kore anō ōu hara e maharatia e ahau.

“Ko koutou hei whakaatu mō tāku,” e ai tā Ihowā, “me tāku pononga i whiriwhiria e ahau, kia mōhio ai koutou, kia whakapono ai ki tāku, kia mātau ai ko ahau ia, kāhore he Atua i whakaahuatia i mua i ahau, kāhore hoki tētahi i muri i ahau.

Ko ahau, ko ahau nei anō, a Ihowā, kāhore atu hoki he kaiwhakaora, ko ahau anake.

Āe rā, i te mea kāhore anō he rā ko ahau tēnei; e kore hoki tētahi e whakaora ake i roto i tōku ringa; māku e mahi, ko wai hoki hei whakakāhore?”

Ka whakakorōriatia ahau e ngā kararehe o te pārae, e ngā kīrehe mohoao, e ngā otereti; nō te mea ka hoatu e ahau he wai i te koraha, he awa i te tītōhea, hei inu mā tāku iwi, mā tāku i whiriwhiri ai; mā te iwi i whakaahuatia e ahau māku, mā rātou e kauwhau te whakamoemiti mōku.

Ka mea ahau ki te raki, ‘Hōmai’; ki te tonga, ‘Kaua e kaiponuhia’; kawea mai āku tama i tawhiti, āku tamāhine i te pito o te whenua – te hunga katoa i huaina nei tōku ingoa mō rātou; nāku hoki rātou i hanga hei whakakorōria mōku: nāku ia i whakaahua, nāku hoki ia i mahi.”

Ko te kupu tēnei a Ihowā, nāna nei i hōmai te ara i te moana, he huarahi i roto i ngā wai kaha. Nāna nei i whakaputa mai te hāriata, te hōiho, te ope, me te kaha; takoto tahi ana rātou, tē ara ki runga; kua keto rātou, kua tineia, ānō he muka.

Ko Ihowā ahau, ko tō koutou Mea Tapu, ko te kaihanga o Īharaira, ko tō koutou Kīngi.”