Popular Bible Verses from Kaikauwhau 2

Share

Ki te tangata hoki e pai ana ki tō te Atua aroaro e hōmai ana e ia he whakaaro nui, he mātauranga, he koa; ki te tangata hara ia e hōmai ana e ia he raruraru, ki te kohikohi, ki te āmene mea mai, hei hoatutanga māna ki te tangata e pai ana ki tō te Atua aroaro. He horihori anō hoki tēnei, he whai i te hau.

Kāhore he mea pai mā te tangata i tua atu i te kai, i te inu, i te mea kia whiwhi tōna wairua i te pai i roto i tōna māuiui. I kite anō hoki ahau i tēnei, nō te ringa o te Atua tēnei. Ko wai oti e nui atu tāna kai, ko wai e reka ake i ahau?

Kātahi ahau ka titiro ki ngā mahi katoa i mahia e ōku ringa, ki te ruhatanga hoki i ruha ai ahau i te mahinga; nanā, he horihori katoa, he whai kau i te hau, ā, kāhore he hua pai i raro i te rā.

Ko ngā mea katoa anō hoki i hiahiatia e ōku kanohi, kīhai i kaiponuhia e ahau i a rāua, kīhai anō i pēhia e ahau tōku ngākau i te meatanga atu ki tētahi whakahari; i hari hoki tōku ngākau i ōku ruhatanga katoa; ā, ko te wāhi tēnei māku o ōku ruhatanga katoa.

Kātahi ahau ka kite, hira ake te whakaaro nui i te wairangi; he pērā hoki me te mārama e hira ake ana i te pōuri.

Ko te tangata whakaaro nui, kei tōna māhunga ōna kanohi, ā, kei te pōuri te wairangi e haere ana. Otiia, i kite anō ahau kotahi tonu te mea e pā ana ki a rātou katoa.

Tēnei hoki tētahi tangata kei runga nei i te whakaaro nui tāna mahi, kei runga i te mātauranga, kei runga i te mōhio; otiia ka waiho e ia hei wāhi mā te tangata kīhai nei i mahi. He horihori anō tēnei, he hē nui.