Popular Bible Verses from Rom 3

Share

Kesua osep ka pula keniye tidue elio epmes ina kodong e tidong mawa ke iye e ke ila bublongon. Lama osep ka pula keniye tidong itau kovok Ida Tapolngon dau didi aitno e makai itosep ke Yesus Krais ka kli udo elio epmes ina. Iye kli udo elio epmes ina ma itopolou itau e osuk ke bitna. Ida Tapolngon soro ila makaingan ke itosep langka presen.

Eknikane elio kene vala dong ka Ida Tapolngon didie e due osep tipolou itau e osuk ke bitna. Iye due osep ka pula keniye ka aitno lisak la dagar ke Yesus Krais tipolou itau e osuk ke bitna. Iye due ila elio kene langane ke osep ka pula keniye.

Ida Tapolngon rere Yesus ma iye polou Ida Kasipngen ma ina metengen e ina marau kasip amunte. E Ida Tapolngon due osep ka pula keniye ka aitno lisak la dagar ke iye urok elio epmes ina noklok la. Ida Tapolngon rere Yesus Ida Kasipngen kesua iye waiki osep ka pula keniye tile omur ke ila elio itau lokono. Oglou alo ka Ida Tapolngon vati osep ka pula keniye urok elio epmes ina lokono iye koli urok elio kovok. Aurou. Iye dong tauni ine vala. Mase iye pagei Yesus ka Ida Kasipngen polou ke ite. Kesua iye waiki iteile omur ke ila elio itau lokono. E eknikane iye due osep ka pula keniye ka aitno lisak dagar ke Yesus tipolou itau e osuk ke bitna. Kesua iye tona itau lokono.

Umoklingen. Moses ila sogongon karanga due ite itopolou itau e osuk ke Ida Tapolngon bitna kovok. Aurou. Iye nis ite ke udo elio epmes ina vala.

Oglou gute napaprangan ina gesa sogo Ida Tapolngon ila pelengon langane. “Gute kene gesa dong ka ila elio itau kovok. E gute kene gesa dong ka iye ile omur ke elio itau kovok. E gute kene gesa dong ka iye krim ke Ida Tapolngon kovok. Kesua osep ka pula keniye tipul dogur ke Ida Tapolngon deka tipolou soulu lokono. E gute kene vala dong ka iye kene due elio itau kovok.

Eknikane iteile omur osep ka tididi Moses ila sogongon vala ma tipolou itau e osuk ke Ida Tapolngon bitna kovok. E osep ka aitno lisak dagar ke Yesus vala ma Ida Tapolngon due isak tipolou itau e osuk ke bitna.

­Umoklingen. Osep ka pula keniye urok pelengon yakngan vala e Ida Tapolngon ila pelengon keniye lokono vala. Oglou osep napaprangan ina tisogo Ida Tapolngon ila pelengon palma ka wai langane. “Osep ka pula keniye tile omur lem pelengon keniye lokono. Langka osep tisin elio vri ke wom urok pelengon mole lem pelengon kovok. Aurou. Ma tibure vala.”