Popular Bible Verses from Vaebulaniya 11

Share

Lino ukumufuuwa uNguluvi kwe kuvedza nu wumasimike ukutigila, dzila dze twihuuvila dzilaakwilidzwa, kangi ukufuuwa ukutigila, dzila dze tusikudziwona lino, dza ndakyene. Avakuhwesu vaalongwaga wunofu mu Wusimbe uWiimike, wiimila wa lufuuwo lwawo kwa Nguluvi.

Sikwali umuunu ye akumukeeledza uNguluvi kitavedza nu lufuuwo. Nayula ye iisaka ukumuhegelela uNguluvi, iisakulwa ukufuuwa ukutigila, uNguluvi kwali, kangi akuvapeela uluwonolo avaanu aviigimba ukumutemula.

Wugendela wa lufuuwo hela, twidzeela ukutigila, ilidugulu lyagaviilwe ni lidzwi ilya Nguluvi, kangi aagavile ifiinu ifiiwoneka ukuhuma kungaya kiinu.

Pakuva uAbulahamu amufuuviilwe uNguluvi, amwidiike uNguluvi pe amukemeeliye ahege mu nyi yaakwe, ahelele ku nyi ye amuhuuviidze ukumupeela. Neke uAbulahamu ahegage, nde luvedze asaadzeeliye kwe iihelela. Kangi wiimila wa lufuuwo lwakwe, iikalile mu nyi iyo ngita mugendzi. Iikalaga mu maheema ngita uIsaka nu Yakobo kye viikalile pambele, navo vaahuuviidzwe uluhuuvidzo luulula lwa nyi ngita lwe aahuuviidzwe uAbulahamu.

Pakuva uNwaka amufuuviilwe uNguluvi, akumwidikaga uNguluvi pe amupaviye ulwa dzila idzisinaa dziwoneka. Neke pa kumuginiya uNguluvi, iiwuyapaga ingalavala, ukuta uNguluvi amupoke umwene pamwinga na vaanu va mu nyumba yaakwe. Wiimila wa lufuuwo lwakwe, avangi mwe naanyi avasamufuuwaga uNguluvi vaahigiilwe. Kangi umwene, aanukiye ilipwela ilya kwidikilwa uwugolofu uwiihumila mu lufuuwo.

Pakuva uHenoki amufuuviilwe uNguluvi, aanyamuliilwe muumi ukuhelela kukyanya, ukuta atane ukufuwa. Lwe lwene uWusimbe uWiimike wiitigila, “Aayagaaniike, pakuva uNguluvi amunyamuwe.” Umusika uNguluvi pe asinaa amunyamula uHenoki kuhelela kukyanya, aalongwaga ukutigila, ye muunu ye amukeeliidze uNguluvi.

Pakuva uHebeli amufuuviilwe uNguluvi, amuteekeliye uwusembe uwunofu ukulutila umaamiye uKayini. Wiimila wa lufuuwo lwakwe, uHebeli aalongiilwe ukutigila mugolofu, uNguluvi pe iidikiye uwusembe waakwe. Nde luvedze uHebeli aafuwe, ulufuuwo lwakwe lwigina ukuvedza kyoledzi kinofu ukwesu.

Pakuva uSala umudala va Abulahamu amufuuviilwe uNguluvi, aapeeliilwe uludali lwa kuhola umwana nde avedze aali mugumba kangi mugogolo. Aapeeliilwe uludali lwa kuhola umwana, pakuva aafuuviilwe ukutigila, uNguluvi ahadza iikwilidza uluhuuvidzo lwakwe.

UAbulahamu aalimile ewo, pakuva aahuuvilaga ukwikala mu wudzenge wukomi uwuli nu waalo uwukwikala mbeepali. Uwo, we wudzenge uwaagelaniidzwe nu kudzengwa nu Nguluvi yumwene.

Pakuva uMose amufuuviilwe uNguluvi, pe aaviye ákulile, aakaanile ukutambulwa muswamuve va mwalive Fwalawo. Umwene aahaaguwe ukupumuka pamwinga na vaanu va Nguluvi, si ngita ukukeela mu ndzanangifu idziihelanidza kisaatu. UMose aaweene ukupumuka wiimila wa Kilisiti kuli luwumbulilo hiilo, ukulutila ukwanukila uwumosi wonda uwa nyi ya Misili. Aalimile ewo, pakuva aahuuvilaga ukwanukila uluwonolo lwe ahadza iipeelwa nu Nguluvi ifigono ifya kuwutalo. Pakuva uMose amufuuviilwe uNguluvi, aahegile mu nyi ya Misili kitoogopa iligooga lya Fwalawo. Iigugumiidze ngita akumuwona uNguluvi ye asiiwoneka pa miiho.

Pakuva uAbulahamu amufuuviilwe uNguluvi, akumutawulaga umuswamuve uIsaka kuvedza wusembe, umusika uNguluvi pe amugemiidze. UAbulahamu aanukiye umuswamuve uyo, ye aahuuviidzwe nu Nguluvi, neke kangi iidikilage ukumutawula umuswamuve umunyakimwinga uyo

Pakuva uLahabu ye aali mwayuuva mugendakyaka amufuuviilwe uNguluvi, asaakomiilwe pamwinga na vaanu avasamwidikaga uNguluvi, pakuva avaanukiye avatendegedzi va Vaisilaheli mu lutengamaso.

Pakuva aVaisilaheli vamufuuviilwe uNguluvi, vaalowiike iNyandza iDuungʼu lwa magulu ngita avaanu kye viigenda pa nyi ingʼafu. Neke kangi umusika aVamisili navo pe vaagelile ukulowoka, viidwibalaga mu lulenga, viifuwaga vonda.

Pakuva aVaisilaheli vamufuuviilwe uNguluvi, vaapiliime ingʼandzi dza wudzenge wa Yeliko figono mufungʼati (7), neke dziguwage.

Pakuva uMose amufuuviilwe uNguluvi, avalagiidze aVaisilaheli vakeelanile ikyaka kya Paasaka nu kubaka idanda ya ndiimwa mu fisuguti fya milyango gya nyumba dzaawo, ukuta umunyamwandza uva kutipula, alaaleka avakome avaana vaawo avavele.

Pakuva uYosefu amufuuviilwe uNguluvi, umusika pe aali biihi ukufuwa, aalongile ukutigila, ndakyene aVaisilaheli valaahega mu nyi ya Misili. Kangi iilagidzaga ulwa kusiila amadzege gaakwe pambele.

Pakuva uYakobo amufuuviilwe uNguluvi, umusika pe aali biihi ukufuwa, avafuunyiliye avaana vavili va Yosefu, nu kwifuunya kwa Nguluvi kuno íisimbiye mu musagi gwakwe.

Pakuva uIsaka amufuuviilwe uNguluvi, avafuunyiliye avaana vaakwe uYakobo nu Esawo ulwa ngʼaani idzikuvaadzila kuwutalo.