Popular Bible Verses from 2 Timoti 1

Share

Pakuva uMubepo uMwimike ye atupeeliye uNguluvi si va woogofi, nda haamu, va ngufu, uwende nu kwiwopa.

Umwene atupokile nu kutukemeelela ku miikalile imiimike. Asaalimile ulo wiimila wa malimo geesu amanofu, nda haamu, aalimile wiimila wa mikeelelele gyakwe nu lusungu lwakwe. Ulusungu ulo, atupeeliye wugendela mwa Kilisiti Yesu, ukuhuma pe kisinaa kigawa kikivedzaga.

Wiimila wa ulo, ndikukwiwusa ukutigila, ugimbage ukufungidza ikipeelwa kyako, ukuta kyakage ngita mooto, ikipeelwa ikyo akupeeliye uNguluvi wugendela wa kukuviikila amawoko gangu, pe ndakwimiike mu malimo ga Nguluvi.

Lino utanage ukuwona nyoni ukoolela imola ya Mutwa veesu uYesu Kilisiti, nambe kuwona nyoni pakuva ndili mu ndinde wiimila waakwe. Nda haamu, uhangage naane mu mumuko wiimila wa Mola iNofu, wugendela wa ngufu ye wiikwanukila ukuhuma kwa Nguluvi.

Lwe lwene ndiipumuka mu idzi, neke kangi sindiiwona nyoni, pakuva ndímudzeeliye ye ndikumufuuwa. Kangi ndiidzeela ndakyene ukutigila, uKilisiti ali ni ngufu iya kuloleela wunofu iMola iNofu ye áameeliye ukufikila ikigono kye alaapiluka.