Popular Bible Verses from Apocalipsis 14

Share

Te'uri xinta jun ch'awb'al chikaj chi xub'ij chwe: Chatz'ib'aj i tziji: “Wo'or, utz ke ike chi kekam na, we je re i Ajwal” Xub'ij chwe. I Lo'laj Utewal i Dios kub'ij: “Qatzij ile, man ke'uxlan che i kichak; xaq i utz chi ki'anom chwach i jyub' ta'aj kkik'am nu b'i ku'.” Kub'ij.

Che iri k-aljin na: ni'pa i je re i Dios, ni'pa i kekojon che utzij upixab', ni'pa i jik kik'ux che i Jesucristo, o uchak kki'an nim che kik'ux chwach i k'ax.

I ángel xsik'in chub'ixkil i tziji: “¡Chixija iwib' che i Dios! ¡Chinimarsaj u'ij! Ya xuriq i ij chi ku'at ni tzij pkiwi i winaq, i ronojel wach ki'anom. Chikojo u'ij i Jun chi xuyijb'a i kaj, i uwach i jyub' ta'aj, xaq i mar, xaq i ralaxb'al taq ya.” Xub'ij.

Te'uri xpe i urox ángel xaq xsik'in chub'ixkil i tziji: “Pachin kkikoj u'ij i nim laj itzel chikop le chi xel li pa mar, xaq che uk'exwach, xaq we kkiya kib' chi koksax i k'utb'al re chwach kikrusil, o xaq che ki'ab', ike le lik kkitij ni uyej rumal i nim laj tojpen chi kpe ru' i Dios. Kkitij ni tojpen uyijb'am i Dios rumal i roywal. Kek'achir ni pa a', xaq chupam i asufra chi kjuluwik. Kkitij ni uyej le chkiwach i lo'laj ángel xaq chwach i jun chi Ral Chij chi Tol qe. I sib' re i a' ipa kek'achir wi, kel b'i chikaj k-e ij saq chrij. Ni'pa i xkikoj u'ij i nim laj itzel chikop le, xaq che uk'exwach, o xaq we xkiya kib' chi koksax i k'utb'al re ub'i chwach kikrusil, o xaq che ki'ab', ike le nti kuxlanik che kik'achirik chipa'ij chicha'ab'.” Xub'ij i ángel.

Te'uri xintaqej chik, xwil i Tol qe, chi Ral Chij kb'ix che, Ire tak'al chwi jyub' Sion. Xaq je o wajxaqlajujchiy (144,000) winaq ru'. Ike o i tz'ib' chwach kikrusil chi are ub'i i Ral Chij chi Tol qe, xaq i ub'i Uqajaw.

Te'uri xwil chik jun ángel krupup chikaj, rok'am i tzij chi nti uk'isik re i qelb'al chupam i qamak. I tzij le, ke i winaq pa ronojel taq tinimit, ronojel taq ulew, ronojel taq kijayil xaq ronojel taq ch'ab'al.

Xk'un chik jun ángel chrij i jun le, i xub'ij: “¡Ya xqaj u'ij i nim laj tinimit chi ajch'oj chrij i Dios, chi are i tinimit Babilonia! ¡Ya xsachsax uwach i tinimit le chi xuk'ut chke konojel i nimaq taq tinimit chu'anik kimak xaq che i kojonik chke i tiox chi xaril je antalik.” Xub'ij i ángel.