Popular Bible Verses from Ròmànì 12

Share

È rzi keka lì òŋgama hwɛ̀ɛ̀mɛ̀ hwe hwatò hwa ene rze ya mɔ̀nyɛ̀, ndi e hwɛmɛ Lohwɛ̀ a tikòwe mèèmà me anyu, aŋga nanù e luwa mèèmà me hvènya. Èŋge ye e gbeyà e rzɔ̀ŋgìtɛ̀nɛ̀ na ò lì òŋgama hweyà na òma Lohwɛ̀ a àrzeyà. Inyɔ e hwi gbamù hweyà ema Lohwɛ̀ a lìŋgàni ndèŋgànà e òŋgama hweyà ema hwe hvòmɛ̀nɛ̀yi.

O eŋgànɛ̀lɛ̀ rzɔ, wònyàmòwe kòkò, èhwanja ò ììlì ndɛnɛ ja ama Lohwɛ̀ ema a jò uŋmɛ̀lɛ̀, na e atɛkɛ nanù ema, ya aŋgbɛ inyɔ hwiti ò ma Lohwɛ̀ nàa jàhwèyà ema i hwèlì lòŋgɛ. Ini jàhwèyà i hwɛni lì hwɛ wòrzàŋgi na lì emeyàhwa na Lohwɛ̀. Nànù ndi inyɔ e hwɛni ò lì kànɛ.

Inyɛ̀ tɔ̀ ima mòtò a hwɛnɛ mɔ̀nyɛ̀ŋgì na lìhvìtà ema a hwɛni. Inyɛ̀ tɔ̀ ima mòtò a àjùlɛ̀ ò tenì ya mètàkà. Tɔ̀ ima mòtò àjùlɛ̀ ò tenì ya màkanɛ̀.

Tɔ̀ mòtò a rzi keka lì emeyà nanù ema wòhwe wò mò kànèyà. Ndi inyɛ gbaamù wò anyu wò rzuwane wòhwe.

Inyɛ̀ tɔ̀ ima mòtò a lìŋgàne ŋmanyàŋgò wa eni na ŋmèma mò eni mò arzɛ. Inyɛ̀ tɔ̀ ima mòtò a ŋgbe ŋmanyàŋgò wa eni èluhwe lì aka mamɛ ema a aŋgbɛ mɔ̀ ŋmìti.

Tɔ̀ ima mòtò a hwɛni lì hwɛnɛ e ndìŋgɛ na hwatò na e jɔ̀kɛ̀. È kɔ̀ mamɛ ema e hwèlì wòhwe. È akakumɛnɛ ò lì gbeyà mamɛ ema e hwèlì gbamù.

È keke e gbèye nanù ema e hwɛ ò ɛ̀yɔ̀lɛ̀ na hwatò hwa arzɛ.

Ìi wònyamòwè kòkò, e hwèlì tɛ nanù ema mòtò a e gbèyi tɛ eyà ya wòhwe, inyɛ inyɔ e rzi keka ò lì mò timbirzɛlɛlɛ. È hwɛmɛ Lohwɛ̀ mɔ̀ ŋmìti a mò kɔ̀kìrzɛ̀. È tìlahwì ò e kààtì ya Lohwɛ̀ nanù ema, “Lohwɛ̀ a òhwi nanù ema, ‘Imba ndi na timbirzɛlɛlɛ wòhwe ema tɔ̀ ima mòtò a gbèyi. Imba e Rzaŋgò ndi na òhwi.’”

È rzi keka ò lì hwɛ rziŋga. Inyɛ̀ tɔ̀ ima mòtò a hwɛnɛ e nyɔ̀ŋgi ya lì gbèeyà e Rzaŋgò na ŋmèma mò eni mò arzɛ.

O e ndèli ya ama Lohwɛ̀ a nò ŋgbelì, na òhweyà tɔ̀ ima mɔ̀kɔ wa anyu nanù ema, tɔ̀ mòtò a rza àŋgàmɛ̀nɛ̀ lì awòwɛ̀ mɔ̀ ŋmìti lì aka mamɛ ema mɔ̀ à hwèlì. Ndi ò arzihwirzɛ ò màlùtèyà ma aŋgɔ̀. Ndeŋgànɛ̀lɛ̀ hvɛ ò àkàyìrzɛ̀ ò wà witi ò lìmɛni la lìlòkɛ̀ ema Lohwɛ̀ à mà màa lì ò ŋgbà.

È hwèlì tɛ nanù ema, mòtò a e gbèyi tɛ wòhwe, e rzi mò timbirzɛlɛlɛ wòhwe. Inyɔ e àŋgàmɛ̀nɛ̀ ndi lì keka ò lì gbeyà gbamù ò mirzɔ̀ ma hwatò hwa arzɛ.

È awòhwànɛ̀ wàna hvɔ̀kɔ mɔ̀kɔ na ɔ̀nɛyi. È rzi ayèkirzɛ̀. È hwɛ mbunda na hwatò ema hwa rza òhvɛ hwetɛmelì ema hwe kàrzamì. Inyɛ̀ tɔ̀ mòtò a rzi ɔ̀ŋgɛ̀lɛ̀ nanù ema mɔ̀ à hwɛni lìhwiyè rzayi-rzayi.

È tìlahwì ò ehvɛhvɛ èki ò e kààtì yà Lohwà nanù ema, “È hwèlì tɛ ema hwàkɔ̀yèlì hwa aŋgɔ̀ hwa hweyà tɛ e njàwò, ò hwa lìrzɛ. Hwa hweyà tɛ e nyìrzɛ̀, ò hwa ŋgbe yòma ya lì nyɔ. Èhwanja ò gbèyi tɛ nanù, òma hwà mà enya.”

È kànɛ nanù ema, Lohwɛ̀ a nàmìrzɛ̀ hwaŋga hwatò ema hwa e tàkìrzɛ̀. È rzi kanɛ̀ nanù ema hwa jemahwe ndi e kànɛ ndi nanù ema Lohwɛ̀ a hwa nàmìrzɛ̀. È òke mɔ̀nyɛ̀ŋgì na hwaŋga hwatò ema hwa hwèlì hwa òka mɔ̀nyɛ̀ŋgì. È ɛhwɛ na hwaŋga hwatò ema hwa ɛhwɛ.

O ìtììtènì ja anyu ja hwatò hwa ama Krirztò, e hwèlì tɛ ema mɔ̀kɔ wa anyu a endèli tɛ yòma, e mɔ̀ ema a e òhvi inyɛ a mò ŋgbe e yɔ. Tɔ̀ njɛnɛ ema a e jɛlɛlɛ nàa ŋmɛ̀nì e mò karzɛ gbamù.

I òhvi hwènàmà hwe nyò rzayi-rzayi ò nyò hvɔ̀kɔ ndèŋgàna hwenè hwènàmà hwe arzɛ hwe gbeyà ihvɛhvɛ nyayi ja hwèwòlò. Ŋgàna hvɔ̀kɔ mɛnɛ, tɔ̀ nɛ irzɔ i kòki, i hwèlì ndi nyò hvɔ̀kɔ, ò lì ahvìyànɛ̀ na Krirztò, ndèŋgàna ja ahwiyanɛ mɔ̀kɔ na ɔ̀nɛyi nàa rzayi-rzayi ja hwènàmà ò nyò hvɔ̀kɔ.