Mãɨnepa ɨt'aa chiidiparima Tachi Ak'õrepa mãrá k'ɨ̃risia teamẽrá. Mãɨya mãrapa k'awadaipɨ k'ãre ichidepa jitadai k'orea nɨ p'anɨt'a, mãɨ jitadamẽrá t'ɨ̃na pẽra. Mãɨne mãrapa k'awadaipɨ ichi ẽpẽrarãpa minachia pia bɨ jitadait'a. Mãɨnepa mɨa ɨt'aa chiidiparima mãrapa k'awadamẽrá ichi jõmãɨrã k'aepẽra atepe jua chaarea bɨt'a. Mãɨ jua chaareadepa ichia tachi ichide ĩjãapataɨrã k'aripa bɨma. Ara mãɨ jua chaarea minachia bɨdepa, Tachi Ak'õrepa Cristo piu bada chok'ae p'irabaripik'ari pajãne ichi juaraari suak'a beepisima. Tachi Ak'õrepa ichi chi atepe bɨsima ãarea jaore mietaarã chi minachia k'awa berã k'aepẽra, pajãnepema chi atepe k'awa berã k'aepẽra, chi jua chaarea berã k'aepẽra, mãɨnepa chi ãarea p'uepataɨrã k'aepẽra. Nãɨ ewaride ichi jõmãɨrã k'aepẽra chi atepe bɨma, mãɨnepa k'aadeapema ewaride pida mãɨya baipɨ.