Popular Bible Verses from Colosense 2

Share

Mãrapa Tachi Chipari Jesucristode ĩjãanana pẽra ichidepa nipat'ɨ. Ichidepa chaarea p'anat'ɨ k'arra minachia jita p'anɨ jĩra mãɨnepa te pia ooda jĩra. Ichide minachia ĩjãa p'anat'ɨ ũpẽarãpa jarateadada jĩra, mãɨnepa ewaricha Tachi Ak'õrea machi sõpia p'anɨane at'ɨ.

Jĩrak'aua p'anat'ɨ mi abaɨa pida mãra seapidaemaapa chi pari k'ɨ̃risiapiparidepa mãɨnepa seaparí k'ɨ̃risiadepa. Jõma makɨɨ chõarãenapema k'ɨ̃risiat'a jaore chaarearã nãɨ ĩjũanepemapɨ. Mãɨ pedea Cristo k'oreawẽpɨ.

Naena mãra piu p'anasidama, ĩjãanawẽa p'anasidepa nemietá oopachida pẽra. Mãɨne tachi k'ak'uapa nemietá ooyá bɨ oopachidama. Maamina Tachi Ak'õrepa mãra Cristo ome chok'ae bɨsima. Jõma tachia nemietá oodada ichia k'ɨ̃risia atuasima. Piarã nemietá oo p'anɨ k'orea tachi, Tachi Ak'õrea tee pará p'anasidama. Mãɨpuru Moisepa bɨdade bɨ bɨma tachi piudai p'anɨ. Maamina Cristo k'urusude piuside Tachi Ak'õrepa mãɨ tee p'anana ãarea k'ɨ̃risia atuasima.

Cristo, ẽpẽra k'ak'uade bɨt'a, mãɨ piarã Tachi Ak'õrepɨ. Mãra Cristo ẽpẽrarã pẽra ichidepa nejõma uru p'anɨma Tachi Ak'õre ome pia p'ananai k'orea. Ichi chi chaarea berã chi Poro Chaareapɨ.

Mãɨpuru mãrapa k'opataɨ k'orea mãɨnepa topataɨ k'orea ẽpẽrarãpa k'achia pedeadaipɨra, ãchi pedea ĩjãarãt'ɨ. Mãrapa arapaapataɨ ewari ak'ɨdak'a, jedek'o chiwidi ak'ɨdak'a mãɨnepa mimianak'apɨ́ ewari ak'ɨdak'a k'orea ãchia k'achia pedeadaipɨra, ĩjãarãt'ɨ. Tachi Ak'õrepa jõma makɨɨ ooi bada tau t'aua unupi basima. Maamina ichia ooi bada Cristodepa jõma oosima.