Popular Bible Verses from 1 Timoteo 6

Share

Ne ãareaɨne Cristode ĩjãa base pia papaká bɨ k'ĩruupari jĩra. Mãɨya pɨ ewaricha Tachi Ak'õre ome baipɨ. Chok'ará p'anɨ k'ĩrari, pɨa Cristode ĩjãa bɨade a jaraside, Tachi Ak'õrepa pɨ t'ɨ̃sima mãɨya chok'ae bamẽrá.

Erreara awaa bɨdeepuru ne k'achia unuparima. Ara mãɨ awaa p'anɨnepa waapẽarãpa Cristode ĩjãa p'anana itu bɨsidama. Mãɨya ãchi minachia mĩa p'aneesidama.

Piarã tachia ne minachia uru p'anɨma jĩp'a ninanepa. Maamina, aba ara tachia nãɨ ĩjũane uru p'anɨnepa arapá p'anɨpɨra, mãɨya baipɨ.

Tachi t'õsidaɨde nãɨ ĩjũanea mi ãpia pida ne enemeenaé pasima. Piuutade mi ãpia pida ne ateewãnaiwẽma.

Nãɨ ĩjũane erreara pará berã́ jarase waapẽarã k'aepẽra chi atepe berã k'ɨ̃risiapidaemaapa. Ãchia ne uru p'anɨ tãaraa choak'a pẽra jarase mãɨ k'orea pia p'ananai k'ɨ̃risiapidaemaapa. Tachi Ak'õret'u k'ɨ̃risiadai pia bɨma. Ichiapuru tachiá nejõma minachia teaparima ne k'ɨ̃risiadawẽa p'ananamẽrá.

Maamina erreara minachia uru k'ɨ̃ria berãpa nejõma awaa p'anɨnepa k'achiade baepatama. Chi ne tachi k'aripak'aɨ mãɨnepa ne tachi nemietá oopataɨ k'ɨ̃ria p'anɨnepa k'achiade p'aneepatama ãnimara k'idap'ede baeda jĩra. Mãɨne ãchi ãarea chichupuria p'aneepatama, toeda t'aawãru jĩra.

Chi ne pará berã́ jarase jõmãɨrã ome nepia oodamẽrá. Mãɨnepa jarase ãchia uru p'anɨnepema sõpiadepa waapẽarã́ teadai k'orea p'ananai p'anɨ. Mãɨya pia oo p'anɨnepa ne yaamaa p'anɨma chi mãɨ ewari cherude pia p'ananai k'orea. Mãɨne ãchi piarã chok'ae p'ananaipɨ.