Popular Bible Verses from 1 ၵေႃးရိၼ်ႇထူႉ 13

Share

မႅတ်ႈ​တႃႇ​ၸိုင်​ၸႂ်​ယႂ်ႇ​ၸႂ်​ယၢဝ်း​လႄႈ ၸၢင်ႈ​ႁဵတ်း​ၵျေး​ၸူး​ဢေႃႈ။ မႅတ်ႈ​တႃႇ​ၼၼ်ႉ​ဢမ်ႇ​မီး​တၢင်း​ဢၼ်​ၶေႉ​ၵၼ်​ၶဵင်ႇ​ၵၼ်။ ဢမ်ႇ​မီး​တၢင်း​ဢၼ်​ဢုပ်ႇ​ဝၢဝ်း။ ဢမ်ႇ​မီး​တၢင်း​ဢၼ်​မႃႇၼႃႉ​ၸႂ်​သုင်။- ဢမ်ႇ​ၸၢင်ႈ​ၵမ်​ၵျၢင်ႉ​တၢင်း​ဢၼ်​ဢမ်ႇ​ထုၵ်ႇ​ဢမ်ႇ​လီ။ ဢမ်ႇ​ၸၢင်ႈ​ႁႃ​ဢၵျူဝ်း​တူဝ်​ၸဝ်ႈ​ၵဝ်ႇ။ တေႃး​သႃႉ​တၢင်း​ၸႂ်​မႆႈ​ဢမ်ႇ​ၸၢင်ႈ​ဢွၵ်ႇ။ ဢမ်ႇ​ၸၢင်ႈ​ထၢင်ႇ​မီး​ဢပႅတ်ႈ။

ၸၢင်ႈ​ႁူမ်​ဝႆႉ​ၵႃႈ​မီး​တင်း​သဵင်ႈ​တင်း​လူင်​ဢေႃႈ၊ ၸၢင်ႈ​ယုမ်ႇ​ၵႃႈ​မီး​တင်း​သဵင်ႈ​တင်း​လူင်​ဢေႃႈ။ ၸၢင်ႈ​မုင်ႈ​ထႃႈ​မွင်း​ထႃႈ​ၵႃႈ​မီး​တင်း​သဵင်ႈ​တင်း​လူင်​ဢေႃႈ။ ၸၢင်ႈ​ယိူၼ်ႉ​ၶၢမ်ႇ​ၵႃႈ​မီး​တင်း​သဵင်ႈ​တင်း​လူင်​ဢေႃႈ။

ဢမ်ႇ​ၸၢင်ႈ​သိူဝ်း​ပျေႃႇ​ၼႂ်း​လွင်ႈ​တၢင်း​ဢၼ်​ဢမ်ႇ​တြႃး​ၼၼ်ႉ။ ၸၢင်ႈ​သိူဝ်း​ပျေႃႇ​ၼႂ်း​သမ်ႇမႃႇ​တြႃး​ဢေႃႈ။

တေႃႈ​လဵဝ်​ၼႆႉ တၢင်း​ယုမ်ႇ​မၢတ်ႈ၊ တၢင်း​မုင်ႈ​ထႃႈ​မွင်း​ထႃႈ၊ တၢင်း​ႁၵ်ႉ​မႅတ်ႈ​တႃႇ သၢမ်​ပႃး​ၼႆႉ​တႄႇ​ဝႆႉ​မီး​ယူႇ​ဢေႃႈ။ ၼႂ်း​သၢမ်​ပႃး​ၼႆႉ တၢင်း​ႁၵ်ႉ​မႅတ်ႈ​တႃႇ ပဵၼ်​ဢၼ်​မျၢတ်ႈ​ၼႃႇ​သေ​ပိူၼ်ႈ​ဢေႃႈ။

မႅတ်ႈ​တႃႇ​ၼၼ်ႉ​ၵၢင်း​လွတ်ႈ​တင်း​ၸႂ်​သၽေႃး​ဢၼ်​ၽွၵ်ႈ​ပျၢၼ်ႇ​ၶိုၼ်း​ၼၼ်ႉ​ယူႇ​တႃႇ​သေႇ​ဢေႃႈ။ ပေႃး​မီး​ၺၢၼ်ႇ​ပရေႃးၽႅတ်ႈ​ၸိုင်၊ ၸၢင်ႈ​ႁၢႆ​လၢႆ​ဢေႃႈ။ ပေႃး​မီး​ဢၶႂၢင်ႉ​ဢၼ်​ၸၢင်ႈ​လၢတ်ႈ​ၵႂၢမ်း​ၽႃႇသႃႇ​ၵူႈ​ၸိူဝ်ႉ​ၵူႈ​ပိူင်​ၸိုင်​တၵ်း​ထၢတ်ႇ​သုတ်း​ဢေႃႈ။ ပေႃး​မီး​ဢတၢတ်ႈ​ပိင်ႇ​ၺႃႇ​ၸိုင်​တၵ်း​ႁၢႆ​လၢႆ​ဢေႃႈ။

ပိၵ်ႉ​သမ်ႉ​ၵဝ်​ၸၢင်ႈ​လၢတ်ႈ​ၵႂၢမ်း​ၽႃႇသႃႇ​ၵူၼ်း ဢိၵ်ႇ​တင်း​ၵႂၢမ်း​ၽႃႇသႃႇ​တမၢၼ်ႇ​ၵၢင်​ႁၢဝ်​သေ​ၵေႃႈ၊ ပေႃး​ၵဝ်​ဢမ်ႇ​မီး​မႅတ်ႈ​တႃႇ​ၸိုင် ပဵၼ်​ၸိူဝ်ႉ​ၼင်ႇ​ပီႇ​ၼႄး​ဢၼ်​မေႃး​သဵင်​ဢိၵ်ႇ​တင်း​ၸိူဝ်ႉ​ၼင်ႇ​သႅင်ႇ ဢၼ်​ၸၢင်ႈ​ပၼ်​သဵင်​ႁႄႇ​ၵူၺ်း​ၼၼ်ႉ​ဢေႃႈ။

ပိၵ်ႉ​သမ်ႉ​ၵဝ်​လႆႈ​ၺၢၼ်ႇ​ပရေႃးၽႅတ်ႈ​လႄႈ​မေႃ​ၸၢင်ႈ တၢင်း​ဢၼ်​လိုၵ်ႉ​ဢၼ်​လမ်ႇ​ၵႃႈ​မီး​တင်း​သဵင်ႈ​တင်း​လူင် ဢိၵ်ႇ​တင်း​ဢတၢတ်ႈ​ပိင်ႇ​ၺႃႇ​ၵူႈ​ၸိူဝ်ႉ​ၵူႈ​ပိူင်​သေ​ၵေႃႈ၊ ပိၵ်ႉ​သမ်ႉ​ၵဝ်​ပျေႉ​ၸုမ်ႇ​တင်း​တၢင်း​ဢၼ်​ယုမ်ႇ​မၢတ်ႈ​ၵူႈ​ၸိူဝ်ႉ​ၵူႈ​ပိူင်​ဢၼ်​ၶၢႆႉ​လွႆ​တင်း​လၢႆ​လႆႈ​သေ​ၵေႃႈ၊ ပေႃး​ၵဝ်​ဢမ်ႇ​မီး​မႅတ်ႈ​တႃႇ​ၸိုင် ပဵၼ်​ဢၼ်​လၢႆ​လၢႆ​ဢမ်ႇ​ပွင်ႇ​လွင်ႈ​ၵႃႈ​သင်​ဢေႃႈ။

ပိၵ်ႉ​သမ်ႉ​ၵဝ်​ၽႄ​ၸွၼ်း​ဢုၵ်ႉ​ၸႃႇ​ၵဝ်​တင်း​သဵင်ႈ​တင်း​လူင်​ႁႂ်ႈ​လႆႈ​လဵင်ႉ​ပိူၼ်ႈ​ဢမ်ႇ​ၵႃး၊ ဢၢပ်ႈ​ပၼ်​တူဝ်​ၶၼ်ႇ​ထႃႇ​ၵဝ် ႁႂ်ႈ​လႆႈ​တုတ်ႇ​ၽႆး​ပႅတ်ႈ​သေ​ၵေႃႈ ပေႃး​ၵဝ်​ဢမ်ႇ​မီး​မႅတ်ႈ​တႃႇ​ၸိုင်​ဢမ်ႇ​မီး​ဢၵျူဝ်း​တီႈ​ၵဝ်။

မိူဝ်ႈ​ဢၼ်​ၵဝ်​ပဵၼ်​လုၵ်ႈ​ဢွၼ်ႇ​ၼၼ်ႉ​ၸိုင်၊ ၵဝ်​ၸၢင်ႈ​လၢတ်ႈ​ၵႂၢမ်း​ၸိူဝ်ႉ​ၼင်ႇ​လုၵ်ႈ​ဢွၼ်ႇ​ဢေႃႈ။ ၸၢင်ႈ​ထၢင်ႇ​ၸိူဝ်ႉ​ၼင်ႇ​လုၵ်ႈ​ဢွၼ်ႇ​ဢေႃႈ။ ၸၢင်ႈ​ၵျၢမ်ႇ​ၸၢင်ႈ​ပွင်​ၸိူဝ်ႉ​ၼင်ႇ​လုၵ်ႈ​ဢွၼ်ႇ​ဢေႃႈ။ မိူဝ်ႈ​ဢၼ်​ဢသၢၵ်ႈ​ယႂ်ႇ​ၸမ်ႉ၊ ၵဝ်​ပႅတ်ႈ​ဝႆႉ​လွင်ႈ​တၢင်း​ဢၼ်​ၸၢပ်ႈ​သႅင်ႇ​ၵၼ်​တင်း​လုၵ်ႈ​ဢွၼ်ႇ​ၼၼ်ႉ​ဢေႃႈ။