Popular Bible Verses from Matéo 6

Share

Peheka raẽ Ñanderuete rembipota ha hetãguasu, ha opaite ko’ã mba’e oñeme’ẽmbáta peẽme.

Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.

Upévare Che ha’e peẽme: Ani pejepy’apy pene rembi’urã rehe térã pemboy’uva’erã rehe, térã peẽ pemondeva’erã rehe; ndaituichavéi mba’e piko ñande rekove, tembi’úgui; térã ñande rete aógui.

Ha nde reñembo’e ramo, eike nde kotýpe, emboty ne rokẽ, ha eñembo’e nde Ruetépe ne añoháme, ha nde Ruete ohechapáva, pe ñemiháme jepe rejapóva, omyengoviáta ndéve.

Upévare péicha peñembo’e: Ore Ruete reĩva yvágape, toñemomba’eguasu nde réra. Tou ne retãguasu, tojejapo avei ne rembipota ko yvy ári yvága peguáicha.

Eme’ẽmína oréve ore rembi’urã roikotevẽva ko árape.

Ha eperdonamína ore rembiapo vaikue, ore roperdona haguéicha ore rapichápe hembiapokue ojapo vaiva’ekue orerehe.

Ha ani reheja rojepy’ara’ã, orepe’a uvei mba’evaígui (añágui).

Peẽ peperdona ramo pende rapicha rembiapo vai, Ñanderuete operdonáta avei pene rembiapo vaikue.

Pema’ẽna umi guyra ovevéva ára rehe, ha’ekuéra noñemitỹi ni nomono’õi mba’e ra’ỹinguéra iñongatuhápe, upeichavéramo jepe pende Ruete, yvágape oĩva, omongaru ichupekuéra. Ha peẽ ningo mba’eguasuve ichuguikuéra.

Ani pembyaty pirapireita ko yvy ári, kupi’i ha ao raso ombyai hag̃uáme, ha mondahakuéra omonda hag̃uáme, pembyaty uvei pirapireita yvágape, kupi’i ha ao raso ombyai’ỹ hag̃uáme, ha mondahakuéra omonda’ỹ hag̃uáme. Nde pirapireita oĩháme, upépe oĩva’erã avei ne ñe’ã (korasõ).

Avave ndaikatúi oservi mokõi járape; upéicharamo ndaija’emo’ãi peteĩva rehe, ha ohayhuvéta ambuépe, térã oñembojáta peteĩre ha oñemboykéta ambuégui. Ndaikatúi peẽ peiko Ñanderuete rembiguái ha avei pirapire rembiguái ramo.

Ñanderuete péicha omonde porã ramo pe yvoty ñu megua, oiko porãvahína ko árape, ha ko’ẽ ramo oñemombótava tatakuápe, piko Ha’e noñangareko porãichéne penderehe, peẽ tekove jerovia’íva.

Nde reipytyvõ ramo nde rapichápe ani reikuaaukátei nde asúpe, pe mba’e nde akatúa ojapóva, (péva he’ise: Ani reñembotuicha ne rembiapo porã rupi nde rapicha renondépe). Upévare eipytyvõ ñemiháme nde rapichápe, ha Ñanderuete ohecháva opaite mba’e nde rejapóva guive, ñemiháme jepe, omyengoviáta ndéve.

Peñeñangarekóke ani hag̃ua pejapo pene rembiapo porã pende rapichakuéra renondépe, pejehechauka hag̃uánte ichupekuéra, péicha avei ani peme’ẽ pirapire imboriahúvape pejehechauka hag̃uánte, péicha ramo Ñanderuete yvágape oĩva ndohepyme’ẽmo’ãvéima peẽme pene rembiapo porã repykue.

Pekaru’ỹ (peajuna) aja, ani peiko tovasýpe umi hova mokõivaicha; ha’ekuéra ningo omoambue hovakuéra, hapichakuéra ohecha hag̃ua ohasaha karu’ỹre. Añetehápe ha’e peẽme, ha’ekuéra ohupitýma hembiapo repykue. Nde rekaru’ỹ aja, emohyakuã ne akã ha ejovahéi, ani hag̃ua nde rapichakuéra ohechakuaa rehasaha karu’ỹre, ha nde Ruete ohechapáva upe rejapóva ne añoháme, Ha’e ohechakuaava’erã ha omyengoviava’erã ndéve umi mba’e rejapóva nde añoháme.