Popular Bible Verses from 2 थिसलूनिकी 2

Share

क्युंबी हो, बाकी बाताऊँ मना भेक जाज्यो। क्युं क आ बात जद ताँई पूरी कोनी होवै जद ताँई परमेसर को बिरोद करबाळा सगळा मिनख चोड़ा म नइ आज्यावीं, सागै की सागै आबी जरूरी ह क बो एक मिनख परगट होसी जखो परमेसर का सगळा नियम कायदानै तोड़सी जिकी सजा नरक म जुग-जुग ताँई ह।

पण परबु का लाडला बिस्वास्यो, थारै ताँई म्हानै सदाई परमेसर को धनेवाद करतो रेह्णो ह, क्युं क परमेसर खुदकी पबितर आत्मा की सक्‍तिऊँ थानै बचार बिका पबितर मिनख होबा अर छुटकारा का पेला फळ होबा ताँई पेल्याऊँ टाळ लिओ ह, क्युं क थे सच प बिस्वास कर्यो ह।

ओ मिनख परमेसर, झूठा देवता अर जानै मिनख धोकीं हीं बा सकै बिरोद म होज्यासी अर बो खुदनै आ सगळाऊँ बडो बतासी। बो परमेसर का मनदर म जार बेठ ज्यासी अर खुदनै परमेसर बतासी।

आपणो परबु ईसु मसी खुदई अर आपणो परम-पिता परमेसर जखो आपणाऊँ परेम करै ह अर जखो आपानै आपकी दयाऊँ जुग-जुग ताँई हिमत बंधवाई ह अर आस दिनी ह, बो था सगळानै चोखा कामा अर बचना म पक्‍को करै अर थारा हिया म हिमत बंधवावै।

इ ताँई परमेसर बा मिनखा की बुदीनै बांद देसी जिऊँ परमेसर का नियम कायदानै तोड़बाळो बानै अरामऊँ भंगरा सकै, जि बजेऊँ बे मिनख बि बात प बिस्वास करसी जखी सच कोनी।

पण बिकै नास होबाऊँ पेली बो सेलाणी-चमत्कार अर ताजूब का काम दिखासी क्युं क बिमै सेतान की सक्‍ति होसी। बो इ सक्‍तिनै बा मिनखानै भंगराबा ताँई काम म लेसी जखा नास होबाळा हीं। क्युं क बे छुटकारा करबाळा सचा चोखा समचारनै कोनी मानसी अर खुदनै परमेसरनै कोनी सूपसी जिऊँ क परमेसर बानै बाका पाप की सजाऊँ बचावै।

पण परमेसर का सगळा नियम कायदानै तोड़बाळो ओला म तो हाल बी काम करर्यो ह, क्युं क अठै क्युं तो पक्काई ह, जखो बिनै इब बी चोड़ा म कोनी आबा देर्यो।