Popular Bible Verses from Pntuura 8

Share

Rmaguh tg7 ngayan pnskraya ciida ka wawa miric de, uka bbsengo dmeka cenga tokey ka ga karac baro.

Miyuk ka tgkingal snkgulan baro de, asi qniqan quyux huda ma puniq gmaxan dara ga sqada bobo dxeral. 1 tnugtruwan bobo dxeral ma 1 tnugtruwan kana qhuni we wada sqmaun. Wada sqmaun ka kana speriq uri.

Qmita ku, mbahang ku paru bale hrenang pneeyah qdiro ga skiya karac baro, rmengo: “Smtali bale! Smtali bale! Smtali bale! Seediq ga meniq bobo dxeral, duma 3 snkgulan baro we uxe beyo mpiyuk da!”

Miyuk ka tg2 snkgulan baro de, asi qdaani ckceka rcilung ka dgiyaq sqama mntena puniq. 1 tnugtruwan rcilung we wada so dara.

Miyuk ka tg3 snkgulan baro de, mtuting peeyah karac baro ka paru pngerah snqama mntena so puniq ga srana, mtuting bobo 1 tnugtruwan yayung ma bobo hrean qsiya. Ngayan pngerah nii we “mngihur.” 1 tnugtruwan kana qsiya we wada mngihur. Kiya de ririh qsiya wada mngihur, mhuqil ka hbaro seediq.

Miyuk ka tg4 snkgulan baro de, 1 tnugtruwan hido, 1 tnugtruwan idas ma, 1 tnugtruwan pngerah we ga sbetun kana. So kiya de 1 tnugtruwan hido, idas ma, pngerah we asi knkuung. 1 tnugtruwan diyan we uka ledax, so kiya ka keeman uri.