Popular Bible Verses from Hesekijel 7

Share

Lengro rup witsrenn le ap o drom, un lengro sonakai hi lenge har tchik. Lengro rup un lengro sonakai nai lell len gar dran o merepen win, ap ko diwes, kai i choli o baro Deblestar pral lende well. Lengro rup un sonakai was tchi-moldo. Jon nai chan les gar, un nai krenn gar pengro per lestar pherdo. Lengro brawlepen his kowa, hoi anas len jaake dur, te peran le o baro Debleskro dromestar tele.

O baro rai rowell, un i pralstune darenn pengro djipaske. Hakeno an o them trissell i darjatar. Me krau lentsa pal kowa har jon kran. Un jaake har kran jon o tchatchepen win pral i wawarende, jaake krau me o tchatchepen win pral lende. Palle dikenn un haiwenn le, te hom me o baro Dewel.

Me dikau buder gar latches ap tute. Man khaiteh tu gar. Ko djungelo koowa, hoi kral, well ap tiro shero pale. Un tu leh tiri phagi. Un tumer dikenn un haiwenn palle, te hom me o baro Dewel.

Me dikau buder gar latches ap tumende. Man khaitenn tumer gar. Ko djungelo koowa, hoi kran, well ap tumare sherja pale. Un tumer lenn tumari phagi. Un tumer dikenn un haiwenn palle, te hom me o baro Dewel, kowa kai tumen dell.