Popular Bible Verses from Hesekijel 34

Share

Kolla, kai nashedo hi, rodau me. Un kolla, kai nashran pen, anau me pale. Un kolla, kai pen dukran, pandau i diklo trujel. Un kolla, kai nasselo hi, krau soreles. Un i thullen un sorelen lau an i jak. Me dau jak ap lende har mishto hi.

Jaake har i bakrengro, kai pash peskre bakre hi, kolen rodell, kai nashran pen, jaake rodau me mire bakren, un lau len pale dran haki platsa, kai le tradedo wan ap ko djungelo kalo diwes.

Kawa penell o baro Dewel, maro rai: Me hom kai, un me dikau kanna pal mire bakren un rodau len.

Me kokres hom lengro bakrengro, un anau len kote, kai le pen tele nai tchiwenn kek darjah. Kawa penell o baro Dewel, maro rai.

Awa, tumer mire menshe, han mire bakre, ap kolende jak dau. Un me hom tumaro Dewel. Kawa penell o baro Dewel, maro rai.

Tu, mensho, pen i pralstunenge pral Israel glan-wi, hoi pral lende wella! Pen lenge: Kawa penell o baro Dewel, maro rai: Djungeles djal tumenge! Tumer han i bakrengre mire menshenge, un hunte anans i Israelitarjen har bakre kote, kai hatsenn le latcho senlepen. Kowa krenn tumer gar. Tumer dikenn kokres ap tumende, te djal tumenge mishto.