Popular Bible Verses from 1. Korintarja 13

Share

Kones hi o Debleskro kamlepen an o dji, kowa rikrella lauter win. Job hi latcho un silwerella gar. Job krell pes gar bares un sharell pes gar. Kones hi o Debleskro kamlepen an o dji, kowa krell kek wi-ladjedo koowa; un dikell gar ap peste kokres. Job dikell ninna ap i wawarende, te djal lenge mishto. Kones hi o Debleskro kamlepen an o dji, kowa mukell pes gar chojedo te krell. Job bistrell o tchilatchepen, hoi i wawar leske kran.

Te hi les o Debleskro kamlepen an o dji un i menshe dukrenn les, hi job gar chojedo pral kowa. Kones hi o Debleskro kamlepen an o dji, kowa patsell halauter. Job dell o wawares gar pre, un rikrell lauter win.

Kones hi o Debleskro kamlepen an o dji, kowa hi gar bachtelo pral o tchilatchepen. Job hi bachtelo pral o tchatchepen.

Kanna atchenna menge kalla triin: – O patsepen ap o Debleste; – i bacht, te djinah mer, te well lauter mishto; – o Debleskro kamlepen. O bareder kol trinendar hi o Debleskro kamlepen.

Well i tsiro, kai tchiwell o Debleskro Ducho i patslenge buder kek lab an o dji. Well i tsiro, kai dell lo len buder kek wawar rakepen. Well i tsiro, kai hunte well men buder kek goswepen. Jek atchella: o Debleskro kamlepen.

Ninna te rakroms me nai an hako rakepen, hoi i menshe un i bolepangre rakrenna, un te wals man gar o Debleskro kamlepen an miro dji, palle woms me har i bashepaskro, kai bashrell gar mishto. Leskro bashepen molella tchi.

Te wals man gar o Debleskro kamlepen an o dji, palle molals ninna kowa tchi, te penoms me i menshenge, hoi o Dewel mande sikras. Te wals man gar o Debleskro kamlepen an o dji, palle molals ninna kowa tchi, te djinoms halauter, hoi i wawar gar djinenna un te haiwoms ko tselo Debleskro drom. Te wals man gar o Debleskro kamlepen an o dji, palle molals ninna kowa tchi, te wals man jek sorelo patsepen, te penoms ap i berge: ‘Hadenn tumen’, un jon hadenna pen.

Te wals man gar o Debleskro kamlepen an o dji, palle molals ninna kowa tchi, te doms miro tselo brawlepen kol tchorwelende, un te mukoms man me djides pre te chatchrell.

Har homs i tikno tchawo, rakrom me har i tchawo, un dikom lauter har i tchawo. Un man his tchawengro koowa an o shero. Har wom i mursh, tchiwom o tchawengro koowa krik.