Popular Bible Verses from 1 Alikɔ̍rīnti 12

Share

Abɔ̍ɔ lipu̍ yī ibi̍īyē yī ɔ̄chɛmɔ̄chɛ, Uhu yī Ɔwɔ ē bī ɔpɔ̄pū ɔha̍ ē chabɔ̄ ka anɔ̍lɔ hɔ̄ abɔ̍ɔ. Ɔla̍ā, o̍ ē ya̍ i̍ngɔ̍ɔ wu̍chē yī ɔnɛ̄ɛhɛhi yī ɔjāmɔjā wa̍a̍.

Ala̍ wa̍a̍ ngmo̍tu̍chɛ̄ re̍ka ibi̍īyē yī Ikra̍yisi a̍nɛ. Ɔnyɔnyɛ lipu̍ yī ala̍ re̍ka ɛbɛha̍ yī ibi̍īyē yī nū a̍nɛ.

Ɛbɛha̍ yī ibi̍īyē ge̍ yɛ ē mi̍chi̍, aa̍ wa̍a̍ ē mi̍chi̍ ɔla̍ā ba̍la anu̍. Ɛbɛha̍ ge̍ chī nāa ɔkɔ̄kā, aa̍ wa̍a̍ ē lɛ ɔwɔ̄wīyā ɔla̍ā ba̍la anu̍.

Ɔ̄chaha̍, Uhu yī Ɔwɔ ē de lɛlā ojo̍ōje̍ ka̍ka̍ ē de ɔ̍. Ɔha̍, o̍ ē chī de ochi̍chi̍ yī lɛlā ojo̍ōje̍ ē de ɔ̍. Ɔ̄chaha̍, Uhu yī Ɔwɔ ē de ɔtū ode che Ɔwɔ ochōche brii ē de ɔ̍. Ɔha̍, o̍ ē chī de wɔhu̍ yī obo̍chi̍ ɔnyɔ̄nyiya ē de ɔ̍. O̍ chī Uhu ūkpo̍he ūkpo̍he nūma̍ ē de a̍nɛ. Ɔ̄chaha̍, Uhu yī Ɔwɔ ē de wɔhu̍ yī lɛlā ɔlɛbɛ̍bi̍ ɔyɔ̍ɔ̄ya̍ ē de ɔ̍. Ɔha̍, o̍ ē de wɔhu̍ yī ɛrɔ̄ yī Ɔwɔ obī ka de āchɛ ē de ɔ̍. Ɔ̄chaha̍, o̍ ē de wɔhu̍ ē de ɔ̍ hɛ̄ɛbɛ nīi ɔlɔjā je̍ ɛjā nīi Uhu yī Ɔwɔ ē kɔ̄ de āchɛ ma̍ hɔ̄ɔ̄hɔ̄ hī onīi i̍ anu̍ ni̍ ma̍ mɛ. Ɔha̍, o̍ ē de wɔhu̍ yī ɔcha ɔlɛbɛ̍bi̍ ɔha̍ ɔkɔ̄kā ē de ɔ̍. Ɔ̄chaha̍, o̍ ē chī de wɔhu̍ ē de ɔ̍ nīi o̍ ē je̍ ochi̍chi̍ yī ɔcha ɔlɛbɛ̍bi̍ nūma̍ ē de ka ē de āchɛ.

O̍ chī Uhu yī Ɔwɔ ūkpo̍he kpo̍kpo̍ nūma̍ ē ya̍ u̍ku̍rɔ̍ nūma̍ wa̍a̍ a̍nɛ. O̍ ē kɔ̄ ɔjā yī ɔnyɔnyɛ ɔnyɔnyɛ ē de ɔ̍ lɔkɔ nīi o̍ hī anu̍ ɔlɔjā ɔtū ma̍.

Wu̍chē yī ɔla̍ā, ɛbɛbɛ yī ibi̍īyē i̍ de iyī wā yi̍ya ni̍. Ɛbɛha̍ ɛbɛha̍ yī ibi̍īyē wa̍a̍ nīi hɔ̄ɔ̄hɔ̄ hɔ̄ɔ̄hɔ̄ ma̍ ē ngmo̍tu̍chɛ̄ gbɛri̍ya̍ tū ɔ̍nyīnū.

Ɛjā nīi Uhu yī Ɔwɔ ē kɔ̄ de āchɛ ma̍ chiko yɛ̄mɛ̄mɛ̄. Uhu nūma̍ lōri̍īnū chī de a̍nɛ. Ɔpɔ̄pū lyɛ̄mɛ̄mɛ̄ nīi ɔ̄chɛ ē bī chrɛ̄ɛrɔ̄ ma̍. Abābā ūkpo̍he nīi ɔ̄chɛ ē chī chrāa anu̍ ɛrɔ̄ ɔla̍ā a̍nɛ. U̍ku̍rɔ̍ ɔya̍ mɛ chiko yɛ̄mɛ̄mɛ̄. Ɔwɔ lōri̍īnū chī de u̍ku̍rɔ̍ ɔya̍ mɛ ē de ɔ̄chɛmɔ̄chɛ la ɔjā nīi o̍ ya̍ ma̍ a̍nɛ.

La ogrēeyī yī āchɛ yī Ɔwɔ, Ɔwɔ ɔlɔjā hu ɔ̄chɛmɔ̄chɛ tū la ɛbɛ nīi ɔlɔjā tū ma̍ a̍nɛ: Ɛbɛ ɔrāarāa - alɛrɔ̄ yī Ikra̍yisi. Ɛbɛ ɔmɛpa - āchɛ ɔkɛrɔ̄ nīi Ɔwɔ tū ma̍. Ɛbɛ ɔmɛta̍ - āchɛ ongū āchɛ lɛlā; ɛha̍, āchɛ ɔyɛ̍ɛ̄lā ɔlɛbɛ̍bi̍. Enīi gba̍a lā che enūma̍ ma̍, āchɛ nīi Ɔwɔ de wɔhu̍ yī obo̍chi̍ ɔnyɔ̄nyiya de wa̍ ma̍, ba̍la āchɛ otū āchɛ wɔbɔ̄, ba̍la āchɛ nīi - alɛhu̍ ma̍, ba̍la āchɛ nīi ē ka ɔcha ɔlɛbɛ̍bi̍ ɛha̍ ma̍.

Wu̍chē oji̍ nɛ, i̍ ɛbɛ ūkpo̍he ē ya̍ ibi̍īyē ligbo̍ ligbo̍ a̍ni̍. Ɛbɛ yɛ̄mɛ̄mɛ̄ ngmo̍tu̍chɛ̄ la ibi̍īyē a̍nɛ.

Ma̍ gɛ, ɛbɛha̍ yī ibi̍īyē yī alɔ nīi alɔ gbɔ̄gbɛri̍ya̍ hīka o̍ i̍ lwɔhɔ̍hu̍ ni̍ ma̍ ge̍ hɔ̄ ni̍ u̍uma, alɔ i̍ ē ya̍ ɔjɔ̄jā mɛ ni̍.

Ibi̍īyē wa̍a̍ ge̍ de pīya īkpīkprī ma̍, kana̍ nīi o̍ ge̍ē plɛ̍ɛ̄lā ma̍? O̍ ge̍ chī de pīya wɔrɔ̄rɔ̄ ma̍, kana̍ nīi o̍ ge̍ē pri̍pī ma̍? O̍ de lɛ i̍ngɔ̍ɔ ma̍, Ɔwɔ de ɛbɛha̍ ɛbɛha̍ yī ibi̍īyē wa̍a̍ nīi hɔ̄ɔ̄hɔ̄ ma̍ tū lɔkɔ nīi o̍ hī ɔ̍ ɔtū ma̍. Ibi̍īyē i̍ ge̍ nyā a̍bɔ̄ yɛ̄mɛ̄mɛ̄ i̍ngɔ̍ɔ ni̍ nɛ, o̍ ge̍ re̍ka ibi̍īyē ni̍.