Popular Bible Verses from Tõodo 8

Share

Tẽeg-y Sẽn-Ka-Saab sẽn yaa yãmb Wẽnnaamã yelle. Bala, yaa bãmb n kõ yãmb pãng tɩ y paam arzɛka, n na n pids bãmb kaool ning b sẽn dag n wẽen ne y yaab-rãmbã wa b sẽn maand dũndã wã.

Bãmb kɩtame tɩ y yã toogo, n kɩt tɩ kom nams yãmba, n yaool n kõ-y mande, yãmb ne y yaab-rãmbã sẽn dag n ka mi, sẽn na n yɩl tɩ y bãng tɩ ninsaal ka na n vɩ ne rɩɩb bal ye, la a na n vɩɩ ne bũmb ning fãa sẽn yit Sẽn-Ka-Saab noorẽ wã.

La y tẽeg Sẽn-Ka-Saab sẽn yaa yãmb Wẽnnaamã sẽn tall yãmb n gilim we-raoogã pʋgẽ yʋʋm pis-naasã, sẽn na n yɩl n nams yãmb la b mak yãmb n bãng bũmb ning sẽn be yãmb sũyẽ wã, y sã n na n saka bãmb tõodã, wall y sã n ka na n sake.

Ra wa n yeel-y tɩ yaa y pãngã ne y nus tʋʋm yĩng la y paam arzegs a woto ye.

Gũus-y y mens n da wa yĩm Sẽn-Ka-Saab sẽn yaa yãmb Wẽnnaamã yelle, n bas bãmb tõodã ne b minindã, la b no-tũuds nins mam sẽn kõt yãmb dũndã wã ye.

Bãng-y tɩ Sẽn-Ka-Saab sẽn yaa yãmb Wẽnnaamã rag n sagenda yãmb wa ned sẽn sagend a biiga.

Yãmb sã n wa rɩ n tɩge, bɩ y pʋʋs Sẽn-Ka-Saab sẽn yaa yãmb Wẽnnaamã bark tẽn-noog ning b sẽn kõ yãmbã yĩnga.

Sak-y Sẽn-Ka-Saab sẽn yaa yãmb Wẽnnaamã tõod la y tũ bãmb soayã, la y zoe bãmba.

Bãmb dɩlga yãmb we-raoogã pʋgẽ, n kõ yãmb mand y yaab-rãmbã sẽn dag n ka mi. Sẽn na n yɩl n sãam y sũurã, n mak yãmb n ges n yaool n maan-y neere.

Yãmb sã n wa rɩ n tɩge, la y wa me ro-sõama n kẽ, tɩ y rũm-bɛdã ne y rũm-bãoonegã fɩɩgdẽ, tɩ y wanzuri wã ne y sãnemã paasdẽ, tɩ y paoongã fɩɩgdẽ, bɩ y gũus n da wa wuk y mens n yĩm Sẽn-Ka-Saab sẽn yaa yãmb Wẽnnaamã sẽn yiis yãmb Ezɩpt yembdã pʋgẽ wã yell ye.

Bala, Sẽn-Ka-Saab sẽn yaa yãmb Wẽnnaamã na n talla yãmb n tɩ kẽes tẽn-noog ning ko-zoetem ne bulsi, la ko-bunds koom sẽn pusgd a toor pʋt pʋsẽ, la tãms zutu. Yaa tẽng sẽn sakd koodo, oorze, la reezẽ tɩɩse, ne kankamse, la gernaad tɩɩse, ne oliiv tɩɩse, la sẽn tar sɩɩdo. Yaa tẽng yãmb sẽn na n dɩt y yam n ka kẽgsdẽ, bũmb sẽn ka na n paoog yãmbã yĩnga. Tẽn-kãng kugã yaa kutu, la yaa tẽng yãmb sẽn na n yãkd zũud a tãmsã pʋse.

Gũus-y la y sak tõod nins fãa mam sẽn kõt yãmb dũnda wã n tõog n vɩɩmde, n lebg wʋsgo, n kẽ tẽng ning Sẽn-Ka-Saab sẽn wẽen n yeel tɩ b na n kõ y yaab-rãmbã pʋgẽ n soog-a.

Yãmb sẽn dag n yer fut ninsã ka ki ye, la y naoã ka mod yʋʋm pis-naasã pʋgẽ me ye.

Yaa bãmb n kɩt tɩ yãmb kẽn we-raoog ning sẽn kẽesd rabeemã pʋgẽ, tẽng ning sẽn tar wag-toose, la namse, n yaa ko-bulga, la ko-yũudã. La bãmb kɩtame tɩ koom yi pĩig pʋgẽ yãmb yĩnga.