Popular Bible Verses from KIDUNG 18

Share

Ida Sang Hyang Widi Wasa dados pasayuban titiange. Ida dados benteng titiange sane kukuh bakuh. Widin titiange dados pasayuban titiange, tur ngiring Ida titiang raharja. Ida nyayubin titiang waluya sakadi tameng. Ida nindihin titiang tur ngrahayuang titiang.

Ambate sampurna pakardin Ida Sang Hyang Widi Wasa! Ambate tuon sabdan Idane! Ida punika waluya sakadi tameng pabuat sakancan anake sane ngulati pasayuban ring Ida.

Titiang nunas ica ring Ida tur Ida ngluputang titiang saking meseh-meseh titiange. Pujija Ida Sang Hyang Widi Wasa!

Sajeroning kamewehan titiange, titiang nunas ica ring Ida Sang Hyang Widi Wasa. Titiang nunas tulung ring Ida Sang Hyang Widi Wasa. Saking Perhyangan Idane Ida mireng atur titiange. Ida mirengang atur titiange buat nunas pitulungan.

Duh Ratu Sang Hyang Widi Wasa, Palungguh IRatu mapaica galang ring titiang. Palungguh IRatu ngicalang kapetengan titiange.

Ida punika Widi sane ngawinang titiang kuat. Ida sane ngawinang pamargin titiange rahayu.

Ida Sang Hyang Widi Wasa punika nyeneng, pujija patindih titiange. Jarwakangja kagungan Ida Sang Hyang Widi Wasa sane ngrahayuang titiang.