Popular Bible Verses from NABI YESAYA 44

Share

Ulun lakar maicayang yeh teken tanahe ane tuh, tur ngadakang yeh klebutan ane membah di tanahe ane tuh latuh. Ulun lakar mriokang kakuatan Ulune sig pianak-pianak kitane, tur maicayang mertan Ulune teken katurunan kitane.

Ida Sang Hyang Widi Wasa sane mrentah tur nyayubin bangsa Israele, inggih punika Ida Sang Hyang Widi Wasa Sane Maha Kuasa ngandika asapuniki: “Ulun ene ane pangawit muah ane panyuud, tuah Ulun ane maraga Widi. Tusing ada Widi ane lenan sajabaning Ulun.

Ulun suba nyampatang dosan kitane buka nyampatang guleme. Ane jani maija mabalik sig Ulune. Tuah Ulun dogen ane ngrahayuang kita.”

Edaja takut ih kaulan Ulune! Sawireh kita suba nawang mungguing Ulun suba ngramalang uli imaluan kanti jani, sakancan unduk ane lakar kasidan tur kita ane dadi saksin Ulune. Adake buin Widi ane lenan? Adake Widi ane mawisesa ane tonden taen dingeh Ulun?”

Ulun Sang Hyang Widi Wasa ane ngardi kita. Uli ngawit kita mara lekad, Ulun suba nulungin kita. Eda kita takut. Kita parekan Ulun, kaula seselikan Ulun ane suecanin Ulun.