Popular Bible Verses from Lburania 11

Share

Kore nkurukoto naa sipata niata ajo kedede nenia baa nisiliguta, niata sipata ajo keasai nenia baa nimidolita. Naa tankaraki apa naata lmakui lang nkurukoto payie eterrepa ꞉Nkai ninche.

Kore naa tenemetii nkurukoto, meidimai payie eiting'idi Nkai, amu kore pooki olotu netii ninye, naa meata ajo payie meiruk nchere keatae Nkai, naa ninye nalak lolo ooyiaya ninye.

Naa to nkurukoto nikiata kiteyieloutua nchere te rerei lenye eitibira ꞉Nkai nkop, metaa kore ntoki nalioo naa te nemelioo eitibiraki.

To nkurukoto eyanyita ꞉Abraam Nkai payie eipot metung'ai nkop enye alo nkae ng'oji naaku kenya nenye. Neinyuototo aing'uaa inia kop abaki meyielo neloito. To nkurukoto eiwuoto alo amany nebik te inia kop naisiligieki ana lomoni, newuon taatua nkajijik nemebikieki ana neikuna tesiedi Isaka o Yakobo oichoo sii ꞉Nkai ilo lekutuk.

To nkurukoto etecheta Noa meli aitejeu nkang enye. Keyanyita Nkai natilika ntoki nalotuta neitu aikata edoli. Kore te inia asata enye e nkurukoto neitodol nkop pooki ajo kedung'okini nkiguana, kake neaku ninye lobo lo loosipat oaata nkurukoto.

To nkurukoto eiliepieki Enok aaya eitu eichamcham lkiye, neitu eitokini aadol amu keiliepie ꞉Nkai ninye aya chumata. Naaku kore eitu eiliepieki ninye, keterrepaki aajo keiting'ida Nkai.

To nkurukoto eitaka ꞉Abel Nkai lasar supat olang le Kain. Naa tankaraki naata nkurukoto payie eikena ꞉Nkai ninye ajo loosipat, netachamayie lasar loo nkichoorot enyena. Naa kore abaki etua Abel, ewuon ake eirorita to nkurukoto.

Naa to nkurukoto apa etumo abaki Sara nkidimata natang'asunyie ichoi o Abraam abaki etaarrarra ninye oleng, nera sii olipi, amu keiruko ilo oitaka Abraam lekutuk.

Amu keanyuta apa ninye ilo kerenket obik ntarasi laa kore ilo oitibira nechet naa Nkai.

To nkurukoto etanya Musa eji layieni le ntito e Parao payie ebulu. Ketegelua ninye meitami sina tenebo o ltung'ana le Nkai alang teneng'idakino ng'ok te nkiti kata. Nechamaa meitami anyit ana naitamaki apa Kristo, alang teneng'idakino parakuoicho e Misiri, neipirie nkonyek enyena inia laata kenya natum. To nkurukoto etung'ayie ninye Misiri meurie lkinkii le inia kop, neng'iri ana ltung'ani otoduaa ilo lemelioo.

To nkurukoto apa etejo Abraam ntai ꞉Isaka metaa lasar payie esaan ꞉Nkai ajoki meitai. Ilo Abraam oatang'amayie lekutuk le Nkai, oitayia layieni lenye obo ake metaa lasar

To nkurukoto apa eima milayoi naji Raab aras e kumojik eitu eri tenebo ꞉lolo oaatanya ening Nkai amu keitoomono neisudoo ltung'ana oochomo aaikitalan inia kop.

To nkurukoto etalang'a ltung'ana loo Isirael mpaso naji Mpaso Nanyiekie aaim atuwuana ake nkop natoyio eimita, kake kore payie ejo ltung'ana loo Lmisiri entalang, neya ninche ꞉mpaso.

To nkurukoto apa etuurori sunta e lkerenket le Yeriko, payie eman ltung'ana loo Isirael aaigilu mperot sapa ana natiaka ꞉Nkai.

To nkurukoto etama Musa ntasim e Pasaka neelie lodo nkutukie ee nkajijik metaa mear ilo malaika oitanapaki metara lkikaun, lkikaun lenche.

To nkurukoto eimaka Yosep naidurra ee ltung'ana loo Isirael to nkop e Misiri neitoki aitaarriyianaki ninche neiko loik lenyena. Ketejo ana, etaa kedung'o tau.

To nkurukoto etamayiana ꞉Yakobo layiok le Yosep, eirrigo atukuny sobua enye asai Nkai etaa keye.

To nkurukoto etamayianaka ꞉Isaka Yakobo o Esao mbaa naawuon kenya epuonu.