Popular Bible Verses from Éxodo 6

Share

Ö̦jö cudeenö, ei ya wa̦ lä cui, Isaeli ebä nija wale a̦no wäyäö cadidio showaobä. Camiyä Jeobaa que ya. Ejidoteli bänö bä nosiemaö fe blacäjouje ja, bä nö ma bleaamaö wejei ma cui, ya bä nia luluaö co̦o fe yadiofälöö. Bä shi ma wa̦limabolajei ma cui, ya bä nia jucäaö co̦o. Ya ishou nö quiliaö ja, ya lojode fa damolalunö, ya bä nia co̦lei.

’Ya bä fa co̦länö, iba ya bä nia tabou showao. Camiyä wale bufiblabeje, cama ya e nia cuo dodijio. Ö̦jö däjä, wale nö nia Bada ö̦jöböaöje. “Ejidoteli bänö bämalecö nö ma bleaamano wejei ma cui, ö̦jö Jeobaa a lä cuinö bämalecö co̦a co̦lema. Ö̦jö bäma a bufiblabä a li dodijiwä”, ya nofi nia tamamou.

Ablaamö a ma cui nija, Isaacö a ma cui nija, Jacobo a ma cui nija, ö̦jö bä nija ya tä a̦fa ulifi lä wäqueno wei jamö ya bä lulubofälöö wä. Ö̦jö tä ulifi ja bä bälöo shi wa̦liobä, ya tä ulifi nia jöbäaö showadao. Ei ya wa̦ lä cui, Jeobaa cä ya wa̦. Inaja wa bä nowa tabä —Moisesi nija a Jeobaa cuma. Inaja showawä, Isaeli ebä nija Moisesi a ma cuno wei ma cui, bä bufi doblaonomi waiquiwä cudeenö, a wa̦ ca̦i ji̦liblanomije. Bä shi lä wa̦limabono wejei jamö bä nö bleaamaö fe balojoomaje cudeenö, a wa̦ ma faö wei, a wa̦ ji̦liblanomije.

Inaja Moisesi a ma cuno wei ma cui, abinaja Jeobaa a cuu mö feduoma. —Fei däjä bada ya nia lä yabäcaö wei wa tä möbä, ö̦jö lä. Tä yai lä lojode wei tä nija a fa quililalunö, bä nia shömaö malä co̦o wei. ¿Ö̦jö tawä? Tä yai lä lojode wei tä nö quiliaö cudeenö, lobe bä nia shömaö co̦o showadao —a cuma.