Popular Bible Verses from 1 Korintus 13

Share

Orang yang sayang pa orang laeng, dia itu sabar, hati bae, tara mangiri, tara angka-angka diri, deng tara sombong. Kong dia lagi tara biking yang tara sopan, deng tara paksa orang untuk iko dia pe mau. Dia tara pangmara, deng tara simpang hati pa orang yang ada biking sala pa dia.

Deng dia lagi batahang deng orang yang pe kalakuang tara bagus, dia salalu percaya pa orang laeng, dia salalu baharap orang laeng biking barang yang butul, deng biar lagi dia dapa siksa macam-macam, dia tetap sabar.

Dia lagi tara sanang kalu orang biking barang yang jahat, tapi dia sanang kalu orang biking barang yang butul.

Jadi, skarang tinggal tiga hal yang penting yang torang musti biking turus-turus: percaya pa Tuhan, baharap pa Dia, deng sayang pa orang laeng. Kong dari tiga ini, yang paling penting, itu sayang pa orang laeng.

Sayang itu akan ada sampe slama-lamanya. Tapi karunia untuk kase tau Tuhan Allah pe pasáng, itu nanti so tara ada lagi. Kong karunia untuk bicara deng bahasa roh, itu akan berenti. Bagitu lagi deng karunia untuk tau samua hal, nanti mo ilang.

Biar lagi Roh Kudus kase pa kita karunia sampe kita bisa bicara deng macam-macam bahasa yang manusia jaga pake, deng bahasa yang malaekat jaga pake lagi, tapi kalu kita tara sayang pa orang laeng, yang kita bicara itu tarada dia pe guna. Itu kita cuma baribut, sama deng orang yang pake gong deng ceker kong kase babunyi sabarang-sabarang.

Biar lagi kita ada karunia untuk kase turus pasáng yang Tuhan Allah kase pa kita, deng biar lagi kita tau samua Tuhan Allah pe rencana yang orang laeng bolong tau, deng biar lagi kita tau samua hal, deng biar lagi kita pe percaya kuat sampe bole kase pinda gunung, tapi kalu kita tara sayang pa orang laeng, kita sama skali tara guna.

Biar lagi kita kase barbage samua yang kita punya pa orang susa, deng biar lagi kita serakan kita pe diri untuk dapa bakar karna iko pa Tuhan Yesus, tapi kalu kita tara sayang pa orang laeng, samua itu tarada dia pe guna untuk kita.

Ambe conto bagini: waktu kita masi ana kacil, kita pe bicara sama deng ana kacil, deng kita pe cara bapikir sama deng ana kacil. Tapi skarang, bagitu kita so basar, kita kase tinggal kalakuang macam ana kacil itu.