Popular Bible Verses from 1 Korintus 14

Share

Barang, Tuhan Allah itu Tuhan yang tara suka ibada yang kaco, Dia suka ibada yang bajalang deng tenang.

Sudara-sudara, ngoni musti berusaha untuk sayang pa orang laeng. Ngoni me musti berusaha skali dapa karunia-karunia dari Roh Kudus, lebe-lebe lagi karunia untuk kase turus Tuhan Allah pe pasáng pa orang-orang.

Padahal, orang yang dapa karunia untuk kase turus Tuhan Allah pe pasáng pa orang-orang, dia itu bicara pa manusia, kong dia pe kata-kata itu dia pe guna untuk tamba kase kuat dorang pe percaya, untuk kase smangat pa dorang, deng untuk kase hibur pa dorang.

Tapi orang yang dapa karunia untuk bicara pake bahasa roh, karunia itu cuma untuk kase kuat dia sandiri pe percaya saja. Sedangkan orang yang ada karunia untuk kase turus Tuhan Allah pe pasáng pa orang-orang, itu dia bole bantu pa jemaat la dong pe percaya lebe tamba kuat.

Jadi bagitu lagi deng ngoni. Kita tau ngoni so berusaha skali dapa karunia-karunia dari Roh Kudus. Itu bagus, tapi yang paling penting, ngoni berusaha dapa karunia yang bisa ngoni pake untuk lebe kase kuat jemaat.