Popular Bible Verses from 1 Pétrus 1

Share

Pinujia Gusti Allah lan Bapaké Gusti kita Yésus Kristus, awit sangka gedéné kawelasan-Né wis nglairké kita menèh lantaran tanginé Yésus Kristus sangka antarané wong mati, tumuju marang urip sing kebak pengarep-arep supaya kita pada nampani warisan sing ora bisa entèk, ora tyiri lan ora bisa alum, sing disimpen ing swarga kanggo kowé kabèh.

Pada bungah-bungaha kanggo perkara kuwi, senajan ing wantyi iki kowé ijik pada kudu ngalami kasusahan kanggo sak untara mangsa, awit sangka anané panggoda werna-werna. Kabèh kuwi mau pamrihé supaya ketara murniné pengandelmu - sing ajiné luwih gedé tenimbang ajiné emas sing bisa rusak, sing diuji murniné karo geni - terus kowé pada nampani pamuji lan kamulyan lan kehormatan, mbésuk ing dinané Yésus Kristus ngétoké Panjenengané.

Nanging kowé pada dadia sutyi ing sak njeruhné uripmu, kayadéné Panjenengané sing sutyi, sing wis nyeluk kowé, awit ana tulisan ngéné: Kowé pada dadia sutyi, jalaran Aku iki sutyi.

Uripmu kaya botyah sing mbangun turut, aja nuruti hawa-nepsuné sing ngwasani kowé nalika kowé ijik pada bodo.

Mulané, tyawisna pikiranmu lan pada sing ati-ati, uga sak kabèhé pengarep-arepmu dasarana ing kawelasan sing dikèkké marang kowé ing wantyiné Yésus Kristus ngétokké Panjenengané.

Awit, “Sak kabèhé manungsa kuwi kaya suket lan kaluhurané kabèh kuwi kaya kembang, suketé dadi garing, lan kembang pada gogrok, nanging tembungé Gusti kuwi tetep ing sak lawas-lawasé.” Ya tembungé kuwi Injil sing wis diwartakké marang kowé.