Popular Bible Verses from जेरमयाह 7

Share

ज़धू मंऐं थारै दाद-बाब मिसर देशा का काढी आणै तै, तधू किई ती मंऐं तिन्‍नां संघै गल्‍ला, मंऐं निं तिन्‍नां लै तधू सिधअ बोलअ त कि तम्हैं रहै मुल्है हूम अर होर बल़ीदान करदै लागी! पर मंऐं किअ त तिन्‍नां लै इहअ हुकम कि तिंयां ज़िहअ हुंह बोले तिहअ ई करे। तै हणअ हुंह थारअ परमेशर अर तै हणीं तम्हैं मेरी परज़ा। तेही ज़िन्दगी ज़िऊआ ज़िहअ हुंह तम्हां लै बोला। तै हणअ थारअ भलअ।’

“पर तिन्‍नैं किई मेरी गल्‍ला शूणीं नां शूणीं! तिन्‍नैं निं मेरी गल्‍ला दी धैन ई दैनअ! उंबल़ै रहै तिंयां तिहअ करदै लागी ज़िहअ तिन्‍नें कदुष्ट अर हठू दिलै बोलअ। तिंयां निं आजू हांढै; तिंयां हटै पिछ़ू।

पर मुंह करनी तम्हां लै तै झींण ज़ै तम्हैं बूरी सोठ अर कदुष्ट काम छ़ाडे अर एकी-दुजै लै शुचै-पाक्‍कै रहे, ऐहा ज़ैगा निं परदेसी अर छ़ुटै-मुक्‍कै दै लान्हैं माठै ठगदै लुटदै लागा। नर्दोश मणछे हत्या करने पाआ छ़ाड़। नां ऐहा ज़ैगा होरी देअआ पूज़दै लागा, तेता करै हणैं तम्हैं बरैबाद ई। ज़ै तम्हैं ज़िहअ हुंह बोले तिहअ ई करे, तै दैणअ मुंह तम्हां ऐहा ज़ैगा बस्सणै। अह आसा सह ज़ैगा ज़ुंण मंऐं पैहलकै ज़मानै थारै दादा-बाबा लै दैनी ती। मंऐं त तिन्‍नां लै इहअ बोलअ द कि अह ज़ैगा हणीं सदा थारी।

स्वर्गे सारी सैनो मालक बिधाता ज़ुंण इज़राईलो परमेशर आसा, सह बोला इहअ, “ज़ै अज़ी बी तम्हैं आपणैं कदुष्ट काम करनै छ़ाडे, तै दैणअ मुंह तम्हां थारी ऐहा ज़ैगा बस्सणै।”