Popular Bible Verses from ज्ञैन 2

Share

बिधाता दैआ अक्ल, ज्ञैन अर मौज़ तेऊ लै, ज़हा का सह खुश हआ, पापी मणछा डाहा सह खटदै, झाल़दै अर भढारा भर्दै लाई, ताकि तेता सह तिन्‍नां मणछा लै दैए, ज़हा का सह खुश आसा। ज़िहअ बागरी पिछ़ू पल़णअ बृथा हआ, तेही आसा अह गल्‍ल बी बृथा।

तेता का आसा इहअ भलअ कि हाम्हां ज़िऊंणीं आपणीं ज़िन्दगी खांदी-पिंदी राज्ज़ी-मौज़ी। पर एथ बी ज़ाण्हिंआं मुखा इहअ कि अह बी भेटा हाम्हां मणछा परमेशरा ई का! ज़ै परमेशर कहा लै नांईं दैए, तै किधा का लाई राज्ज़ी-मौज़ी ज़िन्दगी काटी?

तेखअ लागअ हुंह आपणैं हाथै किऐ दै इना कामें बारै सोठदअ कि तेता लै मंऐं केही खास्सी मैन्थ किई, ज़िहअ बागरी पिछ़ू पल़णअ बृथा हआ, मुखा ज़ाण्हुंई ईंयां गल्‍ला बी तेही बृथा! पृथूई दी निं आफ़ता का सुआई किछ़ै भेटदअ!

मुंह भेटअ ज़िहअ हुंह च़ाहा तिहअ ई अर ज़ेथ मुंह खुशी भेटा ती, मंऐं किअ तिहअ ई। आपणैं इना कामां पिछ़ू सराहिआ त हुंह बेघै अर अह ई भेटअ मुंह मेरी मैन्थो पुआज़अ।

तैबै जाई लागअ मुखा थोघ कि ज़िहअ न्हैरै का राम्बल़अ प्रैश्शअ हआ, तेही हआ ऐडी गल्‍ला का भली अक्ल।

अक्ल हआ मणछा लै दूई आछी ज़ेही, पर ऐडअ रहा न्हैरै बाखा हांढदअ लागी। पर तज़ी बी भाल़अ मंऐं इहअ कि अक्ली आल़ै अर ऐडै मणछे दशा हआ खिरी मरदी पलका एक्‍कै ज़ेही।

हाम्हैं हआ खटणा लै सारी अक्ल, समझ़ अर तेता करा हाम्हैं खास्सै सज़ाण रही करै! खिरी पल़ा हाम्हां तेखअ सह कमाई इहै मणछा लै छ़ाडणीं ज़ुंणी तेता लै किछ़ै मैन्थ निं किई! अह गल्‍ल बी आसा बृथा अर अह गल्‍ल आसा बेघै बूरी।