Popular Bible Verses from Iromayon 1

Share

Mam cut kasilikiito eong' Akiro Nukajokak. Erait apedor ka Akuju naka ayuuni ng'ulu kere lu iyuuto, lusodit Iyaudin nepepe ka ilong'au.

Naarai itoduunete Akiro Nukajokak ekipone lo imarakina Akuju itung'a keng' adolite koking'aren keng'. Erait akitor akiyuun alomun kageunet akitodol osial. Kwape ebalatatar agirasia nukalaunak ebe, “Itwan ni imarakino koking'aren ka Akuju ebe edolit akitor akiyuun, ebuni akijar.”

Ape kesubuna Akuju akwap, ejautene keng' lo etakani, apedor keng' kere na emam kedaun kiton ejautene keng' loka araus Akuju, atakanu kotenan. Etakanete koboro kalu asubu Akuju. Kanuka ng'unu emam itung'a ng'ulu atenikina naka akigang'ite agwoetait kes!

Ejenete kesi Akuju, konye mam keyong'ito nesi kwape itemokinar. Bobo mam kesi kejaasi ka akiyalama kama keng'. Konye arautu awomowomosia kes abang'aanut cut, bobo elelebun akirionus toma adama kes nu eng'aara.

Ilokonyete kesi abeite ka Akuju kiton aliokonu. Imaete kesi ka akijaanakin iboro lukesubi Akuju tia akimaa Lokasuban elope, lo itemokina akitur nesi ikaru kere! Ikote nepeneni.

Etoduun anyunyura ka Akuju alomun kokuju namaka ang'erit ayong'ite Akuju kiton aronus naka ng'ulu kalu iimakiito abeite karonus kes.

Kanuka nu, ajalaki Akuju kesi kisomata asilut na eminasi itawon kes. Atikere aberu ejulakisi ejautene loka aelo, kosodi aberu ka aberu aelokin. Kokipone kalope kang'olo enyekisi ikiliok aelo ka aberu kwape kesubitere Akuju. Kogeunete ikiliok akijekete luce. Isomaete ikiliok iboro luka asilutu ka ikiliok kaluce. Kanuka nu eyaunete kesi ikulopek akitisilaro nama kes, akitisilaro na itemokina kesi adumun kanuka adiakareta kes. Kanu ang'eriata itung'a ng'ulu akipiakin toma adama kes acua naka abeite ikamuut Akuju, egwaki nesi kesi akanin kitung'a kalu ebosito adama, tetere isomaete kesi iboro lu mam kitemokina kesi asoma.

Ebalasi ebe ecuaka kesi, konye ebang'aaka kesi; tia kesi akimaa Akuju lo ejari ikaru kere, imaete kesi aputon nu itenite eputosi ka etung'anan lo etwani kere de ikwenyi, kere ityeng', kere ityeng' lu eliaete.