Popular Bible Verses from Deuteronomio 10

Share

“Jichhasti israelit jakenaca, ¿cunsa Tatitu Diosamajj jumanacat mayipjjtamjja? Juparu jach'añchañanacama, jupan thaquipanjam arcañanacama muni, ucatsti munaraquiwa juparu munapjjañanacama, yupaychapjjañama take chuymampi, take jacañamampi, uqhamaraqui camachi arunacaparjam, leyinacaparjama sum sarnakapjjañamataqui.

Jumanacan Tatitu Diosamasti diosanacansa Diosapawa, uqhamaraqui munañaninacansa munañanipawa; jupawa wali jach'a Diosajja, wali ch'amani, ajjsarcaña, take jakerus quipcaqui uñjaraqui, janiraquiwa kollkempis alayasquiti.

“Jumanacan chuymanacamarojj suma arust'äwiru mantatäquis uca arunaca uchapjjaraquim, jan juc'ampi chuymanacam kalarayasipjjamti.

Jan ucasti cheka cancañampiw uñjaraqui wajcharusa, viuda warmirusa, uqhamaraquiwa muni, mank'ayaraqui, isi churaraqui, jumanac taypin jacqui uca yakha marcat jutir jakerusa. Jumanacasti Egipto marcanjja yakha marcanquirïpjjaraquïyätawa.

Juparuquiwa k'ochunaca churapjjäta, jupaquiw jumanacan Diosamajja, jumanacan uñjcañaraquiw jach'a muspharcañanacjja luraraqui, jumanac laycu.

“Tatitu Diosamarojj jach'añchapjjam, yupaychapjjaraquim jupa saparuqui servipjjam; ucatsti cunapachatï juramento lurapjjäta ucqhasti Diosan sutipjjaru lurapjjaraquim.

Amuyapjjaraquim, jumanacan Tatitu Diosamanquiw alajjpachasa, alajjpachan alajjpachapasa, uqhamaraqui acapachan orakenacasa, take cunatï ucan utjqui ucanacasa.

Jumanacasti munasiñ chuymampiya qhuyapayapjjam yakha marcat jutir jakerojja, jumanacas yakha marcat jutir jaket uñt'atäpjjaraquïyätaw Egipto marcanjja uca laycu.