Popular Bible Verses from 1 Juan 4

Share

Cawquintejj munasiñajj utjqui ucanjja janiw utjquiti ajjsarañajja. Ucat sipana chekpach munasiñanejja ajjsarañjja apanucuwa; ajjsarañasti mutuña catokañataquiwa. Maynitejj ajjsarascchi ucajja, janiw chekpach munasiñanïquiti.

Wawanaca, jumanacajj Diosanquirïpjjtawa, atipt'apjjaractawa uca c'arinacaru; cawquïritejj jumanacampïqui ucajja, juc'amp ch'amaniwa jupanacampïquis ucat sipansa.

Diosaw nayrakat jiwasanacar munistu, ucatwa jiwasajj juparojj munaractanjja.

Munat jilatanaca, munasiñasaw maynit maynicama, munasiñasti Diosatwa juti. Qhitinacantejj munasiñapajj utjqui ucanacasti Diosan wawapawa, Diosarusti uñt'araquiwa.

Qhititejj jan munasiñanïqui ucajj janiw Diosar uñt'quiti, Diosajj munasiñawa.

Aqhamanquiw munasiñajja: janiw jiwasanacati Diosar munapcäyätanjja, jan ucasti jupaw munistu Wawap qhitanisina juchanacasat khespiyañataqui.

Munat jilatanaca, Diosatejj uqham munchistojja, jiwasanacajj munasiñasaraquipï maynit maynicama.

Diosajj qhitaniw mä sapa Wawapa aca orakeru, wiñay jacañanïñasataqui, uqhamanwa Diosajj munasiñap uñacht'ayistu jupa toke.

Ucampis cawquïritejj sejja: “Nayajj Diosarojj muntwa” sasa, ucatsti jilapar uñisiscaraquejja, ucasti c'ariwa. Maynitejj jilapar uñjcasina jan muncchejja, ¿cunjämatsa Diosarojj munaspa jan uñjasajja?

Qhititejj arsquejja: “Jesusajj Diosan Wawapawa” sasa, uquïrejja Diosanwa jaqui, Diosasti jupanaraqui.

Jupajj aca camachwa churawayistu: “qhititejj Diosar munqui ucajja jilaparojj munañaparaquiwa.”

Munat jilatanaca, jan cuna casta yatichäwirus Diosan yatichäwipäcaspas uqham arcapjjamti, jan ucasti yant'apjjam chekpachapunit Diosan Ajayupani janicha. Walja c'ari yatichirinacaw acapacharojj phokhantasqui. Jupanacasti sapjjewa: “Diosanquirïpjjtwa” sasa. Aqhamatwa jumanacajj uñt'apjjäta maynejj Diosan Ajayupanïtapjja: Qhititejj sisqui —“Jesucristojj janchin juti” sasa, uquïristi Diosanquiriwa.

Ucampis qhititejj sisqui: “Jesucristojj janiw janchina jutquiti” sasa, ucajj janiw Diosan Ajayupanïquiti, jan ucasti Cristo conträqui uca ajayuniwa. Jumanacajj ist'apjjtawa uca ajayun jutañapjja; jichhasti ucajj acapachancjjewa.