Popular Bible Verses from 1 Korintefo 13

Share

Ɔdɔ pen kyɛr, ne yamu ye; ɔdɔ nnyɛ ahoɔyaw, ɔdɔ nnyɛ ahohyehyɛ, ɔnnhoran; ɔnnyɛ noho dza ɔmmfata, ɔnnhwehwɛ nankasa nedze, no bo nnhaw no, ommbu bɔn ho akontaa

ɔsoa adze nyina; ɔgye adze nyina dzi; onya adze nyina ho enyidado, na ɔsɔw adze nyina so.

onndzi dɛw wɔ dza ɔnntsen ho, mbom odzi nokwar no mu ehurusi

Na afei gyedzi, enyidado, ɔdɔ, ebiasa yi na ɔwɔ hɔ daa; na hɔn mu kɛse nye ɔdɔ.

Ɔdɔ mmbɔ adze da: na nkɔnhyɛnsɛm dze, wobogu no; ɔkasa horow dze, wobegyaa; nyimdzee dze, wobogu no.

Sɛ medze nyimpa nye abɔfo tɛkyerɛma mekasa, na minnyi ɔdɔ a, mayɛ dɛ ayewa a ɔgyegye nye akasaa a ɔwosow.

Na sɛ mowɔ nkɔnhyɛ akyɛdze, na minyim esumasɛm nyina nye nyimdzee nyina, na sɛ mowɔ gyedzi nyina ma mututu mbepɔw mpo, na minnyi ɔdɔ a, mennsɛ hwee.

Na sɛ medze m’ahodze nyina mema ehiafo, na sɛ medze me nyimpadua ma dɛ wɔnhyew, na sɛ minnyi ɔdɔ a, minnya ho hwee.

Meyɛ abofra no, mekasaa dɛ abofra, modween dɛ abofra, metsee adze ase dɛ abofra; na mebɛyɛɛ panyin yi, medze mbofrasɛm nyina egu nkyɛn.