Ku-tangara hi kuita-ya na làpuru ba na-hapuputu weli diangu. He - herina na kabàla welingu la hau kalibuku karumangu ma-kanjupu bokulu, dàngu hi na-pawiti-nya pa-hambila halawàla na awangu la winggiru-na. La kabilaku mare - rerina nuna paita-ya na ma-handaraku ba hama parunggu-ya. La padua làpuru nunambu, kuita-ha patuda da patau awangu nu da patau awangu da mahama jiangu tauha, tàka na nyuna nimbihu-da patuda da matada dàngu dua mawangu-da da ruu kàpada. Da wihida da-kunduhu dàngu da-kalilangu hama tuna parunggu pauda-ha. Da wua wihida dapawuu hapi mbàtingu. Hinggilu-na ba patu matada dàngu ba dua mawangu ruu kàpada, nyuda ningu lima tauda la lumbu nimbihu ruu kàpada. Da hamawangu ruu kàpa la nimbihu-da nuda da dika da-tawàlahu tàka da hupu - hupuda da-maràngga pa-jonggaru dàngu ruu kàpa dika hawiangu, hi lupa da-pa-okangu kapatu larangu nuda da dika da mapatu-da. Jàka da-nggàduku, handàka nggàduku-mada ba dàngu pa-tarihungu-da la hangga ba dàngu nda pa-mbelingu-da.